Bokin'ny Salamo

Ny mpaminany Davida, nataon'i Nikolaos Doxaras (1705-1775)

Ny Bokin'ny Salamo, na Salamo, dia boky ao amin'ny Baiboly, ao amin'ny Testamenta Taloha izay misy amboaran-kira sy tononkalo fiderana an'Andriamanitra miisa 150. Voasokajy ho bokim-pahendrena na soratra masina izy ka isan'ireo atao amin'ny teny grika hoe ἅγιογραφία / hagiographia ("soratra masina"). Voasokajy ho isan'ireo atao amin'ny teny hebreo hoe Ketuvim ("soratra") izy ao amin'ny Tanakh.

Ny horonambokin'ny Salamo

Fiforonan-teny

Ny teny hoe Bokin'ny Salamo na Salamo dia fanagasiana ny teny grika hoe Βίβλος Ψαλμών / Biblos Psalmôn ("Bokin-kira", "Bokin'antsa") na Ψαλμοί / Psalmoi ("hira, antsa" (milaza maro)). Izany dia nenti-mandika ny teny hebreo hoe ספר תְּהִלִּים / Sefer Tehillim ("Bokim-piderana" na "Bokin-kira fiderana") izay tsorina fotsiny amin'ny hoe תְּהִלִּים / Tehillim ("Fiderana" na "Hira fiderana").

Lohahevitra

Tsy hira fiderana ranofotsiny no hita ao amin'ny Salamo fa misy ihany koa ny hira miompana amin'ny lohahevitra hafa. Ireto misy ohatra amin'ireo lohahevitra hita ao:

• salamo fiderana an'Andriamanitra (ohatra: faha-105),
• salamo fitarainan'olon-tokana amin'Andriamanitra (ohatra: faha-13),
• salamo fitarainan'ny vahoaka amin'Andriamanitra,
• salamo fanehoana ny finoana ny herin'Andriamanitra (ohatra: faha-47),
• salamo fisaorana an'Andriamanitra,
• salamo fiderana atao ho an'ny mpanjaka (ohatra: faha-72),
• salamo anehoana ny fitiavana an'i Jerosalema (ohatra: faha-122)
• salamo fankalazana andro firavoravoana (ohatra: faha-126)
• ary salamom-pahendrena sy fampianarana (ohatra: salamo voalohany).

Ny salamo tsirairay ao amin'ny Baiboly dia tsy natokotoko fa nalahatra. Tsy fiteny, ohatra, ny hoe "Salamo toko faha-10" fa ny hoe "Salamo faha-10" no fiteny. Ny tsirairay amin'izay tokony ho natao hoe "toko" no atao hoe "salamo".

Fizaràna ho boky dimy

Mizara ho "boky" dimy ny Bokin'ny Salamo:

• Boky voalohany: Sal. 1 - 41;

• Boky faharoa: Sal. 42 - 72;
• Boky fahatelo: Sal. 73 - 89;
• Boky fahefatra: Sal. 90 - 106;
• Boky fahadimy: Sal. 107 - 150

Jereo koa

• Joba, 
• Ohabolana
• Mpitoriteny
• Tononkiran'i Solomona