Salamo faha-19

Ny Salamo faha-19 dia salamo ao amin' ny Bokin' ny Salamo ao amin' ny Baiboly. Tafiditra ao amin' ny fizaràna atao hoe "boky voalohany" (Sal. 1 - 41) ity salamo ity.

Lahatsoratra

Dikan-teny katôlika

¹Ho an'ny mpampianatra hira. - Tonon-kiran'i Davida.

      ²Ny lanitra mitory ny voninahitr'Andriamanitra,

ary ny habakabaka manambara ny asan-tànany.

      ³Ny andro mitory fiderana amin'ny andro,

ny alina mampandre izany amin'ny alina.

      ⁴Izany tsy mba fiteny, tsy mba teny

izay tsisy haharenesana ny feony:

      ⁵fa mitety ny tany rehetra ny fanenon'ny feony,

ka tonga hatramin'ny faran'ny tany ny fikarantsan'ny feony.

Dia any izy no nanangan-day ho an'ny masoandro.

      ⁶Ary izy io tahaka ny mpampaka-bady mivoaka avy amin'ny trano fandriany

dia miezaka an-kafaliana toy ny olo-mahery fo, hanafaka ny làlan-kalehany.

      ⁷Any amin'ny ila faravodilanitra izy no miala ;

ary any amin'ny ila faravodilanitra vao tapitra ny diany;

tsy misy tsy takatry ny hafanany.

      ⁸Lavorary ny lalàn'ny Tompo,

mamelombelona ny fanahy;

mahatoky ny teny vavolombelon'ny Tompo,

ka mahahendry ny kely saina.

      ⁹Mahitsy ny fandidian'ny Tompo,

ka mahafaly ny fo;

madio ny didin'ny Tompo,

ka mampahazava ny maso.

      ¹⁰Masina ny fahatahorana an'ny Tompo,

ka maharitra mandrakizay;

marina ny fitsipik'Iaveh,

ka mahitsy avokoa.

      ¹¹Sarobidy noho ny volamena ireny,

mihoatra noho ny volamena madio betsaka;

mamy noho ny tantely izy,

mihoatra noho ny tantely mitete avy amin'ny tohotra.

      ¹²Ny mpanomponao koa dia hazavain'ireny;

ary misy valiny lehibe ho an'izay mitandrina azy.

      ¹³Iza moa no mahalala ny faniasiavany?

Mamelà ahy amin'izay tsy fantatro.

      ¹⁴Arovy amin'ny mpiavonavona koa ny mpanomponao;

aoka tsy hanjaka aminy ireny.

Dia ho lavorary aho, ho madio

amin'ny ota lehibe.

      ¹⁵Raiso amim-pankasitrahana ny tenin'ny vavako,

mbamin'ny fitiavan'ny foko,

eo anatrehanao, ry Iaveh,

Vatolampiko sy Mpanavotra ahy!

Jereo koa

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.