Allah
Allah no anaran' ny Andriamanitra tokana ao amin' ny finoana silamo. Amin' ny Mozilmana dia i Allah no mpahary izao rehetra izao (na ‘âlam), ka maro ny teny amaritan' ny boky Kor'any ny toetrany, toy ny hoe "mahery", "mahay", "be indra fo", sns. Anarana miisa 99 no omen' ny fivavahana silamo an' ity andriamanitra tokana ity, izay atao hoe "anaran' Andriamanitra tsara indrindra".
Tamin' ny nanambaràna ny Soratra Masina, ity andriamanitra ity dia niteny tamin' ny alalan' ny anjely Jibrily (Gabriela) sy ny mpaminany Mohamady izay nandre ny tenin' Andriamanitra fa tsy ny feony. Manana toetra fito fototra ny andriamanitry ny silamo, dia ny fiainana, ny fahalalana, ny hery, ny sitrapo, ny fandrenesana, ny fahitana ary ny fitenenana. Mpahary sy mahefa ary mahalala ny zava-drehetra izy. Izy no tompon' izao rehetra izao sy ny hoavy, mpitsara amin' ny fitsarana farany, niseho tamin' ny mpaminany nifandimby hatramin' i Adama ka hatramin' i Mohamady. Ambara matetika ny fahatezerany ka matetika izy dia atao hoe "ilay Mahatahotra" (arabo: al-Jabbâr na al-Qahhâr). Nefa ny toetrany misongadina indrindra dia ny halehiben' ny famindram-pony izay mahery vaika ka mahasahana ny zavatra rehetra, araka ny voasoratra ao amin' ny Kor'any, boky masin' ny silamo.
Hatramin' ny taonjato faha-20 dia nalain' ny Mozilmana ho azy ireo samirery ny anarana hoe Allah. Ohatra amin' izany ny fanapahan-kevitry ny Fitsarana Maley tamin' ny taona 2009 izay mandrara ny fampiasan' ny Kristiana maley io anarana io, izay tsy nampiasain' ny fivavahana tokana, araka ny tantara, fa nampiasain' ny fivavahana maro. Efa nisy teo amin' ny tontolo arabo talohan' ny fiorenan' ny fivavahana silamo, izay mino andriamanitra maro (pôliteista), mantsy ny andriamanitra mpamorona nantsoina hoe Allah, satria io teny io dia midika fotsiny hoe "Andriamanitra".
Fiavian' ilay anarana[hanova | hanova ny fango]
Ny ankamaroan' ny mpandinika dia mirona amin' ny fiheverana fa ny teny hoe Allah dia niforona amin' ny alalan' ny fanakambanana ny hoe al sy ny hoe ilāh (izay midika hoe "ny andriamanitra", "ilay andriamanitra", endrika voafaritra), ka ny zanatsoratra voalohany amin' ilay teny faharoa (i-) dia nilatsaka tsy voatonona, noho ny fampiasana matetika an' ilay teny. Izany fiheverana izany koa dia noheverina fa avy amin' ilay mpahay fitsipiteny malaza atao hoe Sībawayh (taonjato faha-8).
Raha lazaina amin' ny teny hafa, ny teny hoe Allah dia ahitana ny mpanoritra ال / al (izay manamarika ny maha voafaritra an' ilay teny, toy ny mpanoritra ny ao amin' ny teny malagasy ary misy hamza tsy marin-toerana) sy ny hoe إِلَاه / ilāh na إِلَه / ilah, izay midika hoe "andriamanitra (iray)". Ny teny hoe Al arahin' ny ilāh no endrika voafaritra, manome ny hoe Allāh "ilay Andriamanitra").
Tsy misy fisalasalana fa ny teny mitovitovy endrika amin' ny hoe Allah dia efa nampiasaina amin' ny heviny voalohany hanondroana ny andriamanitra ao amin' ny fiteny semitika: Il na El. Efa nampiasa ny teny hoe ilu ny Akadiana mba hiantsoany ny andriamanitra teo anelanelan' ny taona 4000 sy 2000 tal. J.K. Tamin' ny vanimpotoana talohan' ny fiandohan' ny fivavahana silamo dia nampiasaina ny teny arabo hoe Ilâh mba hiantsoana ny andriamanitra.