Fanjakana Mitambatra

Avy amin'i Wikipedia
(tonga teto avy amin'ny Royaume-Uni)
Sainan' ny Fanjakana Mitambatra
Ny Fanjakana Mitambatra ao Eorôpa sy ao amin' ny Vondrona Eorôpeana (miloko maitso)

Ny Fanjakana Mitambatra na Fanjakana Mitambatr' i Britaina sy Irlandy Avaratra, dia firenena ao Eorôpa Andrefana (ao avaratra-andrefana raha ny marimarina kokoa) niorina tamin' ny taona 1801. Ireo fanjakana nanorina ny Fanjakana Mitambatra dia i Britaina Lehibe (Great Britain) sy i Irlandy Avaratra. Sahabo 66 921 307 ny mponina tamin' ny taona 2019 .[1] Ny fiteny anglisy no fiteny ôfisialy. Ny renivohitra dia ny tanàndehibe London. Firenena manana mpanjaka fehezin-dalàm-panorenana ny Fanjakana Mitambatra, ka manjaka ny mpanjaka nefa tsy miandraikitra ny fampandehanana ny firenena.

I Britaina Lehibe no nosy faha-8 lehibe indrindra maneran-tany, izay ahitana an’ i Angletera, i Ekôsy ary i Valesa. I Irlandy Avaratra dia tapany avaratra-atsinanana amin’ ny nosy Irlandy. Ny Ranomasina Manche no manasaraka azy amin’ i Frantsa. Monina an-tanàn-dehibe ny 90 %n’ ny mponina ao amin’ ny Fanjakana Mitambatra. Anisan’ ireo firenena misy mponina makitroka indrindra ao Eorôpa ny Fanjakana Mitambatra, sady anisan’ ireo firenena manao raharaham-barotra matanjaka sy manana taozava-baventy matanjaka indrindra maneran-tany.

Nanomboka tamin’ ny taonjato faha-18 ny tantaran’ ny "Fanjakana Mitambatr’ i Britaina Lehibe", tamin’ ny nanakaikezan’ i Angletera (izay efa nikambana tamin’ i Valesa tamin’ ny taonjato faha-16) an’ i Ekôsy tamin’ ny alalan’ ilay Act of Union tamin’ ny taona 1707. Talohan’ izany dia tao amin’ ny Empira Rômana ireo faritra telo ireo talohan’ ny hizakany ireo fananiham-bohitra nifanesy sy talohan’ ny hitsaganany ho tany anjakà-mpanjaka, ka ny natanjaka indrindra dia ny Fanjakana Anglisy. Manana tafika an-dranomasina matanjaka ny Fanjakana Mitambatra, izay nahafahany nanao fandefasa-miaramila haka tany hozanahina. Tamin’ ny fotoana niforonan’ i India Britanika anefa dia voatery niatrika ady nifanandrenany tamin' ireo mpitaky ny fahaleovan-tena amerikana tamin’ ny taona 1776 hatramin’ ny 1783 ny Fanjakana Mitambatra: lasa nahazo fahaleovn-tena ny zanatany britanika miisa telo ambin’ ny folo ka niteraka an’ i Etazonia. Teo anelanelan’ ny fiafaràn’ ny taonjato faha-18 sy ny fiandohan’ ny taonjato faha-19 dia teraka sy nandroso tao amin’ ny Fanjakana Mitambatra ny fiovam-penitry ny taozava-baventy, indrindra tamin' ny andron' ny mpanjakavavy Victoria, teo anelanelan’ ny taona 1837 sy 1901. Tamin’ ny taona 1801 no teraka ny "Fanjakana Mitambatr’ i Britaina Lehibe sy Irlandy". Taorian’ ny fivakisana ara-pôlitikan' ny nosy Irlandy dia lasa nantsoina hoe "Fanjakana Mitabatr’ i Britaina Lehibe sy Irlandy Avaratra" ilay firenena. Niatrika ady tamin’ i Alemaina nandritra ny Ady Lehibe Faharoa ny Fanjakana Mitambatra, ady izay nandraisan’ ny praminisitra Winston Churchill anajara lehibe teo amin’ ny sehatra iraisam-pirenena. Nosatrohana ny satro-boninahitra tamin’ ny taona 1952 ny mpanjakavavy Elisabeth II. Taorian’ ny fahaleovan-tenan’ i India (taona 1947) dia nahazo ny fahaleovan-tenany koa ireo zanatany britanika hafa tamin’ ireo taona 1950 sy 1960. Nanomboka nandray anjara tamin’ ny fananganana an’ i Eorôpa ny Fanjakana Mitambatra tamin’ ny taona 1973, nefa tsy dia niditra lalina loatra izy, tamin’ ny fandavany ny fampiasana ny vola Euro.

Olona[hanova | hanova ny fango]

Ohatra amin' ny olona avy any amin' ny Fanjakana Mitambatra izay nanao fandaharana amin' ny fahitalavitra, sy/na nanoratra boky, momba an' iMadagasikara: David Attenborough, Brian Cox, George McGavin, Charlotte Uhlenbroek sy David Bellamy. Roa karazana ny zavamanan' aina eto Madagasikara nomen' i David Attenborough anarana: ny angidina Acisoma attenboroughi sy ny makamba Ctenocheloides attenboroughi.

Jereo koa[hanova | hanova ny fango]

Firenena ao Eorôpa

Albania - Alemaina - Andôra - Aotrisy - Belzika - Bielôrosia - Bolgaria - Bôsnia-Herzegôvina - Danemarka - Espaina - Estônia - Fanjakana Mitambatra - Finlandy - Frantsa - Grisia (na Gresy) - Hôngria (na Hongaria) - Irlanda - Islandy - Italia - Jeôrjia - Kipra (na Sipra) - Krôasia (na - Krôatia) - Letônia - Liktenstaina - Litoania - Loksemborga - Masedônia Avaratra (na Makedônia Avaratra)- Malta - Môldavia - Môntenegrô - Nederlandy - Nôrvezy - Okraina - Pôlônia - Pôrtogaly - Tsekia - Romania - Rosia - San-Marîno - Serbia - Slôvakia - Slôvenia - Soeda - Soisa - Tsekia - Vatikàna.

Kôntinenta eto an-tany

Mbola ambangovangony ity lahatsoratra ity ary tokony hofenoina.

Azonao atao ny mandray anjara eto amin'ny Wikipedia amin'ny alàlan'ny fanitarana azy.
Jereo koa ny pejy Ahoana ny manao takelaka rehefa te-hijery hoe ahoana no fanaovana azy.

Citation[hanova | hanova ny fango]

  1. World Population Review - United Kingdom