Angletera

Avy amin'i Wikipedia

I Angletera (anglisy: England) dia ampahany lehibe indrindra ao amin' ny nosin' i Britaina Lehibe sy ny Fanjakana Mitambatra. I Angletera dia ao amin' ny ampahany manontolo ao atsinanan' i Kambria (anglisy: Walles) sy ao atsimon' i Skôtia (anglisy: Scotland). I Lôndra (anglisy: London) no renivohiny, izay tanàna lehibe dia lehibe sady seranan-tsambo lehibe any Angletera, izay ahitana mponina miisa maherin' ny 7.000.000 tamin' ny taona 2001. Ity tanàna ity ihany koa no renivohitry ny fiombonan' ny firenena miteny anglisy (anglisy: Commonwealth of Nations). Miendrika telolafy i Angletera ka ny tendrony ambony dia eo amin' ny vinanin' ny ony Tweed, eo an-tsisintany isarahany amin' i Skôtia. Ny Ranomasina Avaratra no ao atsinanany, ny Ranomasin' i Irlandy sy i Kambria ary ny Ranomasimbe Atlantika no ao andrefany. Ny ao atsimo dia ny Lakandrano Anglisy (frantsay: La Manche) sy ny Andilandranon' i Dover (frantsay: Pas de Calais). Manana velaran-tany mirefy 131 760 km2 i Angletera.