Passé composé

Ny passé composé dia filazam-potoana ao amin' ny filaza tsotra (mode indicatif) ao amin' ny fitsipiteny frantsay izay amin' ny ankapobeny ilazana zavatra nitranga alohan' ny fitenenana (fotoana lasa) na alohan' ny fotoana heverina (mety ho ny ankehitriny na ny hoavy) sady misy ifandraisany amin' ny fotoana ankehitriny na amin' ny fotoana itenenana. Atao hoe "passé composé" izy satria ampiasana matoanteny mpanampy (frantsay: verbe auxiliaire, mety ho avoir na être) sy ova-matoanteny lasa (frantsay: participe passé) ny fiforonany. Amin' ny fampiasana azy hilazana zava-niseho amin' ny fotoana lasa dia misy fifanoherany izy sy ny filazam-potoana lasa hafa toa ny passé simple sy ny imparfait de l'indicatif.

Fampiasana ny passé composé

Fampiasana azy amin' ny ankapobeny

Ampiasaina hiresahana zava-nitranga tamin' ny fotoana lasa nefa misy ifandraisany amin' ny fotoana ankehitrny na ny fotoana itenenana ny passé composé, izay no tsy itoviany amin' ny passé simple. Izany singa mampifandray izany dia mety ny fari-potoana nisehoan' ilay zava-nitranga na ny vokatr' izany amin' ny fotoana ankehitriny na ny fotoana itenenana.

Ohatra:

• Maintenant, j'ai fini mon travail.
• Nous nous sommes rencontrés la semaine dernière.
• Ils ont réhabilité la maison. Nous pouvons y habiter maintenant.

Passé composé ilazana zavatra mitraga alohan' ny zavatra hafa

Ny passé composé dia ampiasaina hilazana zavatra mitranga alohan' ny zavatra iray hafa lazaina amin' ny alalan' ny matoanteny atao amin' ny présent de l'indicatif, indrindra raha milaza fahazarana na fahamarinana ankapobeny izany.

Ohatra:

• Quand je ne l'ai pas vu, je me décourage.
• Il dort après qu' il a fini de langer.
• Il faut bonne mémoire après qu'on a menti. (Corneille, Le Menteur, iv, 5)

Passé composé ilazana zavatra miverimberina

Ny passé composé dia ilazana zavatra miverimberina tamin' ny fotoana lasa ao anaty fari-potoana voafaritra na raha voafaritra izany fiverimberenana izany (tsy itoviany amin' ny imparfait de l'indicatif) sady misy fifandraisany amin' ny fotoana ankehitriny na amin' ny fotoana itenenana (tsy itoviany amin' ny passé simple).

Ohatra:

• Longtemps, je me suis levé de bonne heure. (Marcel Proust)
• Pendant trois semaines, ils se sont beaucoup entrainés.
• Ils ont souvent vu ces oiseaux dans la forêt.

Passé composé ilazana zavatra hiseho amin' ny hoavy

Ny passé composé dia ilazana zavatra hitranga amin' ny fotoana hoavy izay heverina fa azo antoka ny hahatanterahany, toy ny hita amin' ny fampanantenana. Misolo ny futur antérieur izy amin' izany.

Ohatra:

• J'ai résolu toutes les questions avant ton retour.
• Il a terminé dans quelques instants.

Ny passé composé (fa tsy ny futur antérieur) no ampiasaina ao amin' ny fehezankevitra ampidirin' ny mpampiankina si ("raha") milaza fepetra tokony ho tanteraka mialoha. Tsy afaka mampiditra matonteny amin' ny filazam-potoana futur simple na futur antérieur mantsy io mpampiankina si io.

Ohatra:

• Si tu as fini avant lundi, tu pourras m'accompagner.
• S'il a terminé à midi, nous irons à la pêche l'après-midi.

Jereo koa

• Filazam-potoana

• Filazam-potoana ao amin' ny filaza tsotra (mode indicatif) ao amin' ny fitsipiteny frantsay: présent de l'indicatif, passé composé, imparfait de l'indicatif, passé simple, plus-que-parfait de l'indicatif, passé antérieur, futur simple, futur antérieur, futur simple du passé, futur antérieur du passé.
• Filazam-potoana ao amin' ny filaza ifampiankinana (mode subjonctif) ao amin' ny fitsipiteny frantsay: subjonctif présent, subjonctif passé, subjonctif imparfait, subjonctif plus-que-parfait
• Filazam-potoana ao amin' ny filaza mihonohono (mode conditionnel) ao amin' ny fitsipiteny frantsay: conditionnel présent, conditionnel passé
• Filazam-potoana ao amin' ny filaza mandidy (mode impératif) ao amin' ny fitsipiteny frantsay: impératif présent, impératif passé
• Filazam-potoana ao amin' ny filaza tsy mitanisa (mode infinitif) ao amin' ny fitsipiteny frantsay: infinitif présent, infinitif passé
• Filazam-potoana ao amin' ny ova-matoanteny (mode participe) ao amin' ny fitsipiteny frantsay: participe présent, participe passé