Fitrandrahana harena an-kibon' ny tany eto Madagasikara

Avy amin'i Wikipedia

Ny fitrandrahana harena an-kibon' ny tany eto Madagasikara dia kely sady miangona manodidina toerana lavitra ahitana tahirin' akora voajanahary betsaka[1]. Ahitana otrik' akora mineraly misimisy ihany ny eo amin' ny mineraly indostrialy sy momba ny metaly, ny angovo, ny vato saro-bidy sy antonony, ary ny vato fanaingoana[2]. Ny sehatry ny fitrandrahana harena an-kibon' ny tany dia tsy noraharahain' ny fitondrana malagasy nandritra ny am-polo taonany maro talohan' ny taompolo 2000[3]. Tamin' ny taona 2013 ny asa fitrandrahana, izay loharanon-karena anaovana fampiasam-bola vahiny, dia nisedra fahasahiranana noho ny "vidin' ny metaly ambany sy ny ahiahin' ny orinasa", izay azo lazaina fa vokatry ny fanonganam-panjakana tamin' ny taona 2009[4].

Tantaran' ny fitrandrahana[hanova | hanova ny fango]

Ny any ambanin' ny tanin' i Madagasikara dia ahitana tahirin' akoram-barahina, vy, manganezy, manjarano (na grafita), siravato, nitera, pirita ary mineraly hafa koa[5]. Tamin' ny fanombohan' ny taonjato faha-20 dia notrandrahana avy tamin' ny antsanga miangona manerana ny Nosy ny volamena. Torak' izany koa ny antimoaniona sy ny varahina sy ny vy sy ny firapotsy dia heverina fa misy betsaka, ankoatry ny tara asfalta sy ny arintany ary ny solitany.

Ny tahirin' akoram-bolamena voajanahary dia hita tao amin' ny lohasahan' ny reniranon' Ampoasary, izay mivarina any amin' ny onin' i Mananjary, any atsinanan' Ambositra. Raha nanadio ny vovo-bato misy volamena amina sahafa vy ny olona tokony ho 3 000 eo tamin' ny fiandohan' ny taonjato faha-20, dia nantenaina fa ny fitrandrahana ireo haran-dranomasina dia hisolo ny fomba fiasa nentim-paharazana amin' ny fitrandrahana ny volamena. Tamin' ny taona 1905 dia maro ireo fikambanana tany Transvaal (Afrika Atsimo) niforona mba hividy tany eto Madagasikara[6].

Ny vokatra sy ny fiantraikany[hanova | hanova ny fango]

Sady ahitana fitrandrahana madinika sy lehibe ny eto Madagasikara. Ny famokarana volamena tamin' ny taona 1904 dia nahatratra 2 641 kg izay nitentina 316 995 livatra sterling. Ny taona manaraka, dia nahatratra 2 370 kg izany, ary nitentina 286 804 livatra sterling. Akoram-by milanja 10 taonina no azo tamin' ny fitrandrahana madinika tamin' ny taona 1905[6].

Ny taham-pitomboan' ny famokarana voarakitra amin' io seha-pitrandrahana io dia 121 % tamin' ny taona 2010, izay voatazon' ny fitombon' ny famokarana agata, vatokaranana (na koartsa), zirkôna, ilmenita (na fasimainty), rotila, labradôrita, sokay, vatovandana (na marbra), simenitra, manjarano (na grafita), vatosoa, nikela ary kôbalta[7].

Ny lalàna mifehy ny fitrandrahana[hanova | hanova ny fango]

Ireo lalàna ankehitriny momba ny harena an-kibon' ny tany dia ireto:

  • ny lalàna laharana faha-2005-022 tamin' ny 17 Ôktôbra 2005, izay nanova ny lalàna laharana faha-2001-031 tamin' ny 8 Ôktôbra 2002 mametra ny fitsipika manokana iantohana ny fampiasam-bola;
  • ny lalàna laharana faha-2005-021 tamin' ny 17 Ôktôbra 2005 nanova ny lalàna laharana faha-99-022 tamin' ny 19 Aogositra 1999;
  • ary ny fehezan-dalàna momba ny harena an-kibon' ny tany; ny didim-panjakana laharana faha-2006-910 tamin' ny 19 Aogositra 2006 momba ny fanatanterahana ny fehezan-dalàna mifehy ny harena an-kibon' ny tany[2].

Ny entam-barotra[hanova | hanova ny fango]

Ireto avy ireo mineraly azo ampiasaina amin' ny sehatra indostrialy sy metalika: ilmenita, manjarano, sokay, vatosanga (na zipsa), vatovary (na dôlômita), silisy, eladrano (na mikà), titanina, koartsa, volamena, volamahery (na platinina), volafotsy, vy, varahina, fanitso (na zinka), nikela, kôbalta, kraomita, arintany ary oraniôma. I Madagasikara dia betsaka vato saro-bidy toy ny robisy, safira, emeralda, akoamarîna (na berila manga maitso), berila, tormalina, tôpazy, grenata, kôrdierita, vatokaranana mavokely, ametista ary sitrinina. Ny vato fanaigoana dia ahitana ny vatovandana sy ny hazovato ary ny jaspy (na jaspa)[2].

Jereo koa[hanova | hanova ny fango]

Fitrandrahana

Seha-pihariana

  • Fambolena eto Madagasikara
  • Fiompiana eto Madagasikara
  • Jono eto Madagasikara
  • Taozava-baventy eto Madagasikara
  • Fitaterana eto Madagasikara

Loharano[hanova | hanova ny fango]

  1. ↑ Europa Publications (2003). Africa South of the Sahara 2004. Psychology Press. ISBN 978-1-85743-183-4, p. 638.
  2. ↑ 2,0 2,1 et 2,2 "Mining: Madagascar, land of hidden treasures" Archived Desambra 20, 2017 at the Wayback Machine. Economic Development Board of Madagascar.
  3. ↑ International Monetary Fund (13 February 2007). Republic of Madagascar: Poverty Reduction Strategy Paper. International Monetary Fund. ISBN 978-1-4527-4374-5, p. 92.
  4. ↑ Iloniaina, Alain; Lough, Richard (2 December 2013). "Analysis: Madagascar faces struggle to restore mining industry" Archived Mey 8, 2015 at the Wayback Machine. Reuters. Notsidihina tamin'ny 24/05/2015.
  5. ↑ Western and Company (1896). Engineering and Mining Journal (Public domain ed.). Western and Company., p. 122.
  6. ↑ 6,0 et 6,1 House of Commons (1907). Sessional papers. Inventory control record 1 (Public domain ed.). Great Britain. Parliament., p. 431.
  7. ↑ "2010 Minerals Yearbook Madagascar" (pdf). U.S. Department of the Interior. Notsidihina tamin'ny 26/05/2015.
Hita tao amin'ny "https://mg.wikipedia.org/w/index.php?title=Fitrandrahana_harena_an-kibon%27_ny_tany_eto_Madagasikara&oldid=1068886"