Siravato

Avy amin'i Wikipedia
Siravato avy amin' ny toeram-pitrandrahana sira any Wieliczka, Małopolskie (Pôlônina).

Ny siravato dia karazana mineraly mivaingana misy klôriora-na sôdiôma (NaCl). Ity mineraly ity dia malemy, tena maivana, marefo, mora vaky, manana tsiron-tsira, satria misy sira ny ankabeazany, ary misy ihany koa na dia kely dia kely aza ny iôda, ny brôma, ny fliôro, ny vy, ny ôksizenina ary ny silisiôma. Hita ao anaty vatolampy karazana evapôrita izy.

Raha madio izy, sady miforona tsara ny kristaly, dia tsy misy loko, nefa mety hiloko fotsy koa. Ny fisian' ny loto dia mety hanome loko volondavenona, manopy mavo hatramin' ny manopy mena, manopy manja, mainty na manga na volomparasy aza.

Ny mineraly madio, izay mando raha tsapaina, dia marin-toerana kokoa noho ny siravato mahazatra, izay mazàna miharava noho ny loto, lasa fatra bitika malemy toy ny klôriora-na kalsiôma na klôriora-na maneziôma. Levona anaty rano ny siravato. Ity faha mora levona an-drano ity, sy ny tsiron-tsira ao aminy, ary ny endrika goba na ny fizarazaran' ny kristaliny, dia ahafahana mamantatra azy haingana. Raha hafanaina izy dia mihasimba ny akora mineraly, avy eo mitsonika. Mandoko mavo mamiratra ny lelafo ny pitika avy amin' ny siravato, izany dia toetra mampiavaka ny iôna sôdioma.

Ity mineraly ity dia hita matetika amin' ny sira fôsily an-dranomasina miaraka amin' ny vato evapôrita na vato hafa ao anaty sahalempona iangonan' antsanga. Tena ilaina amin' ny fiainan' ny biby sy ho an' ny toekarena ny siravato. Ny siravato miseho eny ambonin' ny tany na fantatra noho ny fisian' ny loharanon-tsira dia fantatry ny vahoaka mpiompy hatramin' ny Andro Taloha.