Rotila

Avy amin'i Wikipedia
Rotika anaty klôrita.
Rotila anaty vatokaranana.

Ny rotila dia karazana mineraly misy diôksidan-na titanina, izay manana raikipohy TiO2; mena na mainty ny lokony, ny fanjelany dia toy ny an' ny diamondra. Ny rotila dia mivaingana ao amin' ny rafitra efajoro ka lasa kristaly iraizotongotra matroka na tantera-pahazavana, ary mahalana kokoa amin' ny vangongo mihizina sy mivongana. Matetika io mineraly io no misy vy (izay 10 % amin' ny hadiry manontolo), tantala, niôbiôma, krôma, vanadiôma ary firamainty. Ny rotila dia mamela loko volontany hatsatra. Miovaova ny hamafiny izay eo anelanelan' ny 6 sy 6,5 ary ny hakitroky anelanelan' ny 4,18 sy 4,25. Io no endrika marin-toerana indrindra amin' ny diôksida-na titanina ary miforona amin' ny hafanana ambony, miaraka amin' ny brokita miforona amin' ny hafanana ambany ary ny anatanazy miforona amin' ny hafanana ambany kokoa.

Faritra mamokatra rotila tamin' ny taona 2005.

Ny rotila dia trandrahana hahazoana titanina ary ny santionany miloko antitra dia mitapatapaka manjelatra. Izy dia mineraly fanampiny amin' ny vatolampy maro toy ny granita, ny dôlômita, ny vatosokay vokatry ny fiovana, ny mikasista, ary matetika izy dia miseho amin' ny endrika kristaly manify ao anaty vatokaranana.

Ny tahiry malaza dia any Etazonia, any Nôrvezy, any Frantsa ary any Soisa.