Aller au contenu

Vatorano

Avy amin'i Wikipedia
Vatorano na granita

Ny vatorano na granita dia vato magmatika (atao hoe plotônika koa) manana firafitra kristaly hita maso, ahitana feldspata sy vatokaranana ary misy eladrano kely (biôtita na moskôvita) ary mineraly fanampiny kely, toy ny zirkôna, ny apatita, ny manetita, ny ilmenita ary ny sfena. Miovaova ny lokony, nefa matetika izy no mainty ka antsoina hoe vatomainty. Ny granita sy ny vato hafa miaraka aminy no mandrafitra ny ampahany be amin' ny kôntinenta eto an-tany.

Eo anelanelan' ny 2,63 sy 2,75 ny hakitroky ny granita. Matanjaka noho ny vatovary sy ny vatosokay ary ny vatovandana (na marbra) ny granita, ka sarotra ny fitrandrahana azy. Vato fanaovana fanorenana manan-danja ny vatorano, tena mahatohitra ny fahasimbana ny tsara indrindra amin' ny granita.

Toy izao ny fangaro simika antsalany amin' ny granita: diôksida-na silisiôma (SiO2) 74,5 %, ôksida-na viraty (Al2O3) 14 %, ôksida-na sôdiôma sy ôksida-na pôtasiôma (Na2O, K2O) 9,5 %, ôksida hafa toy ny an' ny vy (Fe), ny an' nymanganezy (Mn), ny an' ny maneziôma (Mg) ary ny an' ny kalsiôma (Ca) 2 %.

Mazàna fotsy na volondavenona, misy pentipentina vokatry ny kristaly izay matroka kokoa, ny vatorano. Manome loko menamena an' ilay vato ny pôtasi-na feldspata.

Avy amin' ny magmà mihamangatsiaka tsikelikely any ambanin' ny tany ny granita, izay matetika mamorona plotôna izay mipoitra vokatry ny fikao-tany izay manaisotra ny vato eo amboniny. Ny granita sy ny vato kristaly hafa no fototra ilafihan' ny kôntinenta.

Miely betsaka indrindra amin' ny ampinga prekambriana tranainy (niforona mihoatra ny 4 lavitrisa taona lasa izay) ny granita: an' i Rosia, an' i Afrika, an' i Kanada, an' i Amerika Atsimo, an' ny faritr' i Britaina Lehibe, indrindra any Ekôsy sy Britaina.

Jereo koa[hanova | hanova ny fango]