Evan'ny zodiaka

Avy amin'i Wikipedia
Sauter à la navigation Sauter à la recherche

Ny evan'ny zodiaka dia ireo kisary sy anarana izay ampifanandrifina amin'ny faritry ny lanitra ka miisa roa ambin'ny folo izy ireo, dia ireto avy amin'ny teny malagasy: Alahamady, Adaoro, Adizaoza, Asorotany, Alahasaty, Asombola, Adimizana, Alakarabo, Alakaosy, Adijady, Adalo, ary Alohotsy.

Ny fotoana andalovan'ny masoandro ao amin'ireo fari-danitry ny evan'ny zodiaka ireo dia tsy mitovy amin'ny fotoana idiran'ny masoiandro ao amin'ny fari-danitry ny antokon-kintan'ny zodiaka. Ny zodiaka foronin'ny evan'ny zodiaka dia atao hoe zodiaka mikisaka fa ilay foronin'ny antokon-kintan'nhy zodiaka kosa dia atao hoe zodiakan-kintana. Ny anaram-bolana avy amin'ny teny arabo ao amin'ny tetiandro malagasy dia anaran'ny evan'ny zodiaka sy anaran'ny antokon-kintana nefa efa tsy mifanandrify ny fotoan'ny volana malagasy sy ny fotoana andalovan'ny masoandro ao amin'ny antokon-kintana mitovy anarana aminy.

Ny evan'ny zodiaka araka ny fanandroana tandrefana[hanova | hanova ny fango]

Alahamady[hanova | hanova ny fango]

Ny Alahamady no vintana voalohany ao amin'ny fanandroana manaraka ny zodiaka. Ny teny hoe Alahamady dia avy amin'ny anaran'ny antokon-kintana amin'ny teny arabo hoe االحمل / Al-Hamal izay midika hoe "ondrilahy". Ny Alahamady ao amin'ny zodiaka mikisaka (frantsay: zodiaque tropique) dia eo anelanelan'ny 21 Marsa sy 20 Avrily. Ny fotoana andalovan'ny masoandro eo amin'ny antokon-kintan'ny Alahamady anefa dia manomboka amin'ny 18 Avrily hatramin'ny 13 Mey.

Ao amin'ny fanandroana malagasy dia vintana voalohany koa ny Alahamady ka ny zoro avaratra-atsinana amin'ny trano no toerana omena azy. Io zoro io dia atao hoe zorofirarazana koa.

Adaoro[hanova | hanova ny fango]

Ny Adaoro no vintana faharoa ao amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اثور / Ath-Thur na Ath-Thaur ("ombilahy") ny hoe Adaoro. Ny Adaoro ao amin'ny zodiaka mikisaka dia avy eo amin'ny 21 Mey ka miafara amin'ny 20 Jona. Ny fotoana andalovan'ny masoandro eo amin'ny antokon-kintan'ny Adaoro dia amin'ny 13 Mey hatramin'ny 21 Jona.

Ao amin'ny fanandroana malagasy dia vintana faharoa koa ny Adaoro ka ny tapany avaratra amin'ny rindrin-trano atsinanana no toerana omena azy.


Adizaoza[hanova | hanova ny fango]

Ny Adizaoza no vintana fahatelo ao amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اجوزاء / Al-Djuza ("kambana") ny hoe Adizaoza. Ny fotoan'ny Adizaoza ao amin'ny zodiaka mikisaka dia avy eo amin'ny 21 Mey ka miafara amin'ny 21 Jona. Ny fotoana andalovan'ny masoandro eo amin'ny antokon-kintan'ny Adizaoza dia amin'ny 21 Jona hatramin'ny 20 Jolay.

Ao amin'ny fanandroana malagasy dia vintana fahatelo koa ny Adizaoza ka ny tapany atsimo amin'ny rindrin-trano antsinanana no toerana omena azy.


Asorotany[hanova | hanova ny fango]

Ny Asorotany no vintana fahefatra ao amin'ny fanandroana manaraka ny zodiaka sy ao amin'ny fanandroana malagasy manara-bolana. Avy amin'ny anaran'antokon-kintan'ny zodiaka amin'ny teny arabo hoe اسرطان / As-Saratan na As-Sartan ("foza") ny hoe Asorotany. Ny fotoan'ny Asorotany ao amin'ny zodiaka mikisaka dia avy eo amin'ny 22 Jona ka miafara amin'ny 22 Jolay. Ny fotoana andalovan'ny masoandro eo amin'ny antokon-kintan'ny Asorotany dia amin'ny 20 Jolay hatramin'ny 10 Aogositra.

Ao amin'ny fanandroana malagasy dia vintana fahefatra koa ny Asorotany ka ny zoron-trano atsimo-atsinana no toerana omena azy.


Alahasaty[hanova | hanova ny fango]

Ny Alahasaty no vintana fahadimy amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اأسد / Al-Asad ("liona") ny hoe Alahasaty. Ny fotoan'ny Alahasaty ao amin'ny zodiaka mikisaka dia manomboka amin'ny 23 Jolay ka miafara amin'ny 22 Septambra. Ny fotoana andalovan'ny masoandro eo amin'ny antokon-kintan'ny Alahasaty dia manomboka amin'ny 10 Aogositra ka miafara amin'ny 16 Septambra.

Ao amin'ny fanandroana malagasy dia vintana fahadimy koa ny Alahasaty ka ny tapany atsinanana amin'ny rindrin-trano atsimo no toerana omena azy.


Asombola[hanova | hanova ny fango]

Ny Asombola no vintana fahenina amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe السنبلة / As-Sumbul ("virjina") ny hoe Asombola. Ny Asombola ao amin'ny zodiaka mikisaka dia manomboka amin'ny 23 Septambra ka miafara amin'ny 22 Oktobra.

Ao amin'ny fanandroana malagasy dia vintana fahenina koa ny Asombola ka ny tapany andrefana amin'ny rindrin-trano atsimo no toerana omena azy.


Adimizana[hanova | hanova ny fango]

Ny Adimizana no vintana fahafito amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اميزان / Al-Mizan ("mizana") ny hoe Adimizana. Ny fotoan'ny Adimizana ao amin'ny zodiaka mikisaka dia eo amin'ny 22 Septambra hatramin'ny 22 Oktobra. Ny fotoana andalovan'ny masoandro ao amin'ny fari-danitry ny antokon-kintana Adimizana dia amin'ny 31 Oktobra hatramin'ny 22 Novambra. Ao amin'ny fanandroana malagasy dia vintana fahafito koa ny Adimizana ka ny zoron-trano atsimo-andrefana no toerana omena azy.


Alakarabo[hanova | hanova ny fango]

Ny Alakarabo no vintana fahavalo amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اعقرب / Al-Akrab ("maingoka") ny hoe Alakarabo. Eo amin'ny 20 Novambra hatramin'ny 29 Novambra ny fotoana andalovan'ny masoandro ao amin'ny fari-danitry ny antokon-kintana Alakarabo.

Ao amin'ny fanandroana malagasy dia vintana fahavalo koa izy ka ny tapany atsimo amin'ny rindrin-trano andrefana no toerana omena azy.


Alakaosy[hanova | hanova ny fango]

Ny Alakaosy no vintana fahasivy amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اقوس / Al-Kaus ("mpitifitra tsipika") ny hoe Alakaosy. Amin'ny 22 Novambra hatramin'ny 21 Desambra ny fotoan'ny Alakaosy araka ny zodiaka mikisaka. Ny fotoana andalovan'ny masoandro ao amin'ny fari-danitry ny antokon-kintana Alakaosy dia amin'ny 18 Desambra hatramin'ny 18 Janoary.

Ao amin'ny fanandroana malagasy dia vintana fahasivy koa ny Alakaosy ka ny tapany avaratra amin'ny rindrin-trano andrefana no toerana omena azy.


Adijady[hanova | hanova ny fango]

Ny Adijady no vintana fahafolo amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe اجدي / Al-Djadi ("osilahy") ny hoe Adijady. Amin'ny 21 Desambra hatramin'ny 20 Janoary ny fotoan'ny Adijady ao amin'ny zodiaka mikisaka. Ny fotoana andalovan'ny masoandro ao amin'ny fari-danitry ny antokon-kintana Adijady dia eo amin'ny 19 Janoary hatramin'ny 15 Febroary.

Ao amin'ny fanandroana malagasy dia vintana fahafolo koa ny Adijady ka ny zoron-trano avaratra-andrefana no toerana omena azy.


Adalo[hanova | hanova ny fango]

Ny Adalo dia vintana fahiraika ambin'ny folo amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe ادلو / Al-Dalu ("mpandraraka rano") ny hoe Adalo. Amin'ny 21 Janoary hatramin'ny 18 Febroary ny fotoan'ny Adalo araka ny zodiaka mikisaka. Mandala eo amin'ny fari-danitry ny antokon-kintana Adalo ny masoandro amin'ny 16 Febroary hatramin'ny 11 Marsa. Ao amin'ny fanandroana malagasy dia vintana fahiraika ambin'ny folo koa ny Adalo ka ny tapany andrefana amin'ny rindrin-trano avaratra no toerana omena azy.


Alohotsy[hanova | hanova ny fango]

Ny Alohotsy dia vintana faharoa ambin'ny folo amin'ny fanandroana manaraka ny zodiaka. Avy amin'ny anaran'antokon-kintan'ny zodiaka amin'ny teny arabo hoe الحوت / Al-Hut ("trondro") ny hoe Alohotsy. Amin'ny 20 Febroary hatramin'ny 20 Marsa ny fotoan'ny Alohotsy ao amin'ny zodiaka mikisaka. Ny fotoana andalovan'ny masoandro ao amin'ny antokon-kintana Alohotsy dia amin'ny 12 Marsa hatramin'ny 18 Avrily. Ao amin'ny fanandroana malagasy dia vintana faharoa ambin'ny folo koa ny Alohotsy ka ny tapany antsinana amin'ny rindrin-trano avaratra no toerana omena azy.