Valan-javaboarim-pirenena Andasibe-Mantadia

Ny Valan-javaboarim-pirenena Andasibe-Mantadia dia faritra arovana mirefy 155 km², any amin' ny 150 km atsinanan' Antananarivo, ahitana ala tsy vaky ao amin' ny Faritra Alaotra-Mangoro any amin' ny tapany atsinanan' i Madagasikara.^[1] Eo anelanelan' ny 800 sy 1 260 m ny haavo misy ilay valan-javaboary, sady manana toetany mando. 1 700 mm ny salan' ny rotsak' orana isan-taona, ary 210 andro isan-taona ny filatsahan' ny orana. Toeram-ponenan' ny karazan-javamananaina maro dia maro ity ala trôpikaly ity, ao anatin' izany ny karazam-biby tsy fahita firy sy atahorana ho lany tamingana, anisan' izany ny karazana gidro miisa 11. Ny ampahany roa amin' io valan-javaboary io dia ny Valan-javaboarin' i Mantadia sy ny Tahirin-javaboarin' Analamazoatra, izay malaza amin' ny fisian' ny gidro lehibe eto Madagasikara, dia ny babakoto na endrina (Indri indri).^[1]

Tantarany

Tamin' ny taona 2007 no voatendry ho anisan' ny Lova Iraisam-Pirenena an' ny Ala Mando any Atsinanana ilay valam-pirenena. Tsy voafantina ho amin' ny lisitra farany anefa ny ala ao aminy.^[2]

Anisan' ny valan-javaboahary mora tsidihina indrindra eto Madagasikara ho an' ny avy ao Antananarivo, izay lalana maharitra 3 ora raha andehanana fiara miantsinanana amin' ny lalana vita tara, dia ny lalam-pirenena faha-2 (RN2). Na dia akaikin' Analamazaotra sy ny foibem-pitantanana ny vala aza Antsampanana amin' ny RN2 dia tsy maintsy misy ny fitaterana manokana na alaina any amin' ny hôtely eo an-toerana vao tonga any Mantadia. Matetika hita any amin' ny faritra sasany ao amin' ilay valan-javaboary ny fitsangantsanganana maharitra 1-6 ora. Ilaina ny mpitari-dalana eo an-toerana ho an' ny mpitsidika miditra amin' ny ampahany amin' ilay valan-javaboary.^[1]

Zavaboary

Ny ala mikitroka ao amin' ny Valan-javaboarim-pirenena Andasibe-Mantadia dia fonenan' ny karazan-javamananaina manan-danja samihafa, anisan' izany ny karazana tsy fahita afa-tsy eto Madagasikara na ao amin' io valan-javabory io manokana sy atahorana ho lany tamingana. Ny 77 % amin' ny karazan-javamaniry, ny 80 % amin' ny karazam-biby, ary ny 58 % amn' ny karazam-borona dia tsy fahita any ivelany.

Tontolo voajanahary, tandindomin-doza

Ahitana ala voalohany 80 % ary ala faharoa 13 %, vokatry ny asan' ny olombelona ny Valan-javaboarim-pirenena Andasibe-Mantadia. Tandindomin-doza ny rohivoary noho ny doro tanety sy ny tavy, ny fitrandrahana hazo tsy ara-dalàna, ny fihazana tsy ara-dalàna, ary ny fanangonana zavamaniry arovana. Ity toe-javatra ity dia azo hazavaina amin' ny ampahany noho ny tsindry vokatry ny fihabetsahan ny mponina sy ny tsindry ara-piarahamonina izay fahita amin' ny firenena mahantra indrindra eran-tany. Tamin' ny taona 2001 dia notombanana ho ny 5 % amin' ilay faritra no voakasiky ny fambolena nentim-paharazana.^[3]

Karazam-biby

Ny valan-javaboary dia ahitana karazana vorona 108, karazana biby mampinono 72, anisan' izany ny karazana gidro (Lemuridae) 14; karazana biby mandady 51, karazana Amphibia 84, ary karazana bibikely 350. Ny 82 % amin' ny karazan-javamananaina ao amin' ilay valan-javaboary no tsy fahita any ivelany.

Izao ny karazana hita ao:

ny bibilava manditra Sanzinia madagascariensis,
ny varika Eulemur fulvus, ny sifaka Propithecus diadema, ny varika Varecia variegata, ny haihay (Daubentonia madagascariensis), ny gidro Eulemur rubriventer, ny gidro Microcebus rufus,
ny vorona Terpsiphone mutata, ny vorona Motacilla flaviventris, ny vorona Aviceda madagascariensis, ny foditany Crossleyia xanthophrys, ny vorona Coua caerulea,
ny lolo Chrysiridia rhipheus, ny hala Caerostris darwini,
ny tanalahy Calumma parsonii,
ny trandraka Tenrec ecaudatus, ny vorona Coua reynaudii,
ny trondro Ratsirakia legendrei sns.^[3]

Karazan-javamaniry

Maro koa ny karazan-javamaniry ao amin' ilay valan-javaboary: ny karazana ao amin' ny fianakaviana Orchidaceae, ny Psidium cattleianum, ny karazana ao amin' ny vondrona Eucalyptus, ny karazana volo ao amin' ny fianakavian-javamaniry Bambusoideae sns.^[3]

Jereo koa

Valan-javaboary

Valan-javaboarim-pirenena Andasibe-Mantadia • Valan-javaboarim-pirenena Andohahela • Valan-javaboarim-pirenena Andringitra • Valan-javaboarim-pirenena Ankarafantsika • Valan-javaboarim-pirenen' ny Helodranon' i Baly • Valan-javaboarim-pirenena Isalo • Valan-javaboarim-pirenena Kirindy Mitea • Valan-javaboarim-pirenena Mananara-Avaratra • Valan-javaboarim-pirenena Marojejy • Valan-javaboarim-pirenena Masoala • Valan-javaboarim-pirenena Midongy Atsimo • Valan-javaboarim-pirenen' ny Tendrombohitra Ambre • Valan-javaboarim-pirenena Namoroka • Valan-javaboarim-pirenena Nosy Ve-Androka • Valan-javaboarim-pirenena Ranomafana • Valan-javaboarim-pirenena Tsimanampetsotsa • Valan-javaboarim-pirenena Zahamena • Valan-javaboarim-pirenena Zombitse-Vohibasia

Loharano

↑ ^1,0 ^1,1 et ^1,2 https://madagascar-circuits-tours.com/deux-jours-a-andasibe/
↑ https://www.voyagemadagascar.com/guide-madagascar/attraction/le-parc-national-andasibe-mantadia
↑ ^3,0 ^3,1 et ^3,2 https://parcs-madagascar.com/parc/mantadia/

[:0-1] 1,0 ^1,1 et ^1,2 https://madagascar-circuits-tours.com/deux-jours-a-andasibe/

[2] ttps://www.voyagemadagascar.com/guide-madagascar/attraction/le-parc-national-andasibe-mantadia

[:1-3] 3,0 ^3,1 et ^3,2 https://parcs-madagascar.com/parc/mantadia/

[1]

[2]

[3]