Kisarisary Ôfita

Ny Kisarisary ôfita na Diagrama ôfita dia kisary maneho fombafomba sy manana toetra esôterika ampiasain' ny hetsika ôfita ao amin' ny gnôstisisma, izay nanaja ny bibilava na menaranan' ny saha Edena ho mariky ny fahendrena, izay nezahin' ny Demiorga ratsy fanahy nafenina tamin' i Adama sy i Eva.

Samy milazalaza an' ireo kisary ireo i Kelsôsy sy i Ôrigenesy mpifanohitra aminy (Contra Celsum, vi. §§ 24-38), na dia amin' ny fomba tsy mitovy aza. I Kelsôsy dia mamaritra azy ireo ho faribolana folo misaraka, voahodidinin' ny faribolana iray, izay atao amin' ny teny grika hoe ψυχὴ κόσμου / psychè kósmou "fanahin' izao tontolo izao", i Leviatàna, voazaran' ny tsipika mainty matevina, i Tartarôsy, miaraka amin' ny efamira, misy teny voalaza eo amin' ny vavahadin' ny Paradisa. Ankoatra izany, ny Ôfita dia lazain' i Kelsôsy fa nanampy ny tenin' ny mpaminany, sy faribolana mifandindry, miaraka amin' ny zavatra sasany voasoratra ao anatin' ny faribolana kôsmôlôjika lehibe roa maneho an' Andriamanitra Ray sy an' Andriamanitra Zanaka.

Nohamafisin' i Ôrigenesy fa nisy faribolana roa mitovy ivo, ary eo amin' ny savaivon' izy ireo dia nisy soratra hoe ΠΑΤΗΡ / patêr ("ray") sy ΥΙΟϹ / uios ("zanaka"); nisy faribolana kely mihantona amin' ilay lehibe, misy teny hoe ΑΓΑΠΗ / agapê ("fitiavana"). Rindrina iray no mampisaraka ny fanjakan' ny ny hazavana amin' ny fanjakana afovoany. Misy faribolana roa hafa mitovy ivo, mazava sy maizina, izay maneho ny hazavana sy ny aloka. Nahitana faribolana nisy soratra hoe ΖΩΗ / zôn ("fiainana") teo amin' io faribolana roa sosona io, ary nisy faribolana roa hafa nifanapaka ka lasa roazodafy tsy mira lafy (rômbôida). Teo amin' ny faritra iraisany dia nisy teny hoe ΣΟΦΙΑϹ ΦΥϹΙϹ / sophia phusis ("ny fomban' ny fahendrena"), eo ambonin' ny hoe ΓΝΩϹΙϹ / gnôsis ("fahalalana"), ary eo ambanin' ny hoe ΣΟΦΙΑ / sophia ("fahendrena"); tao amin' ny rômbôida dia nisy soratra hoe ΣΟΦΙΑϹ ΠΡΟΝΟΙΑ / sophia pronoia (" fitantanan' ny fahendrena"). Nisy faribolana fito avokoa, ary nisy anaran' ny arkônta fito.

i Mikaela, amin' ny endrika liona;
i Sariela, amin' ny endrika ombilahy;
i Rafaela, amin' ny endrika dragona;
i Gabriela, amin' ny endrika voromahery;
i Taotabaôta ("Tohu wa-Bohu"), amin' ny endrika loham-bera;
i Erataota, amin' ny endrika lohan' alika;
i Ônôela na Tartaraôta, amin' ny endrika lohan' ampondra.

Mety mitovy amin' ny taranaka fiton' i Ialdabaôta ireo arkônta ireo. Izy ireo dia manondro ny tontolo materialy, izay manaraka ny fanjakana afovoany, ary ifaranan' ny fanjakan' i Sôfia. Ny Sefirot ao amin' ny kabala jiosy dia mety misy ifandraisany amin' ity kisary ity (Myer, p. 311-13). Ny bibilava toy ny tandindona anefa dia hita koa mifandray amin' ny mistery tany Ejipta, Gresy, Fenisia, Siria, ary Babilônia sy India mihitsy aza.

Boky azo anovozan-kevitra

Myer, Isaac (1888). Qabbalah: The Philosophical Writings of Solomon ben Yehudah Ibn Gebirol. Philadelphia: Published by the author. p. 311.

"The Ophite Diagrams" published by the Gnostic Society Owens, Lance (editor) citing A. H. B. Logan, The Gnostics: Identifying an Early Christian Cult, 2006 & Reconstructing the Ophite Diagram, A. J. Welburn, Novum Testamentum, Vol. 23, Fasc. 3 (Jul., 1981), pp. 261-287