Logia

Ny logia (grika: λόγια raha maro) na logion (grika: λόγιον, raha tokana), tany Grisia tamin' ny Andro Taloha, dia teny vokatry ny tsindrimandry avy amin' ny andriamanitra na avy amin' Andriamanitra na masina. Ao amin' ny lovantsofin' ny jodaisma helenistika sy ao amin' ny kristianisma, io teny io dia mitovy amin' ny hoe "Tenin' ny Tompo".

Nanomboka tamin' ny taonjato faha-19, ny mpamakafaka ny Testamenta Vaovao dia saika nampiasa an' io teny io hanonadroana ny "teny" nataon' i Jesoa (na Jesosy) manokana. Mitana toerana ivo eo amin' ny fikatsahana an' i Jesoa ara-tantara ireo logia ireo satria mifandray amin' ny fiandohan' ny Filazantsara kanônika, indrindra ny sinôptika. Ny Loharano Q izay nofaritan' ny petra-kevitry ny loharano roa, raha ny marina, dia fitambaran' ny logia (teny) nataon' i Jesoa izay nampiasain' i Matio sy i Lioka.

Ny teny hoe logia na logion dia nampiasaina amin' ny fomba samihafa ao amin' ny asasoratra tamin' ny Andro Taloha sy teo amin' ny manam-pahaizana môderina momba ny fifandraisana avy amin' Andriamanitra. Raha ny vanim-potoana nampanjaka ny paganisma dia "filazana" no tena hevitr' io teny io, fa ny asasoratra jiosy sy kristiana kosa dia nampiasa ny teny hoe logia hiresahana indrindra "ny Soratra Masina avy amin' ny tsindrimandrin' Andriamanitra".

Ny fisehoan' io teny io malaza sy niteraka adihevitra be dia ao amin' ny fitantaran' i Papiasy avy any Hierapôlisy momba ny niandohan' ny Filazantsara kanônika. Nanomboka tamin' ny taonjato faha-19, ny manam-pahaizana momba ny Testamenta Vaovao dia nirona tamin' ny fanokanana ny teny hoe logion hanondroana ny tenin' Andriamanitra, indrindra fa ny tenin' i Jesoa, mifanohitra amin' ny fitantarana, ary niantso ny fitambaran' ireo teny ireo, araka ny nasehon' ny Filazantsaran' i Tômasy hoe logia.

Ny toetoetran' ireo logia ireo dia niadian-kevitra hatramin' i Papiasy avy any Hierapôlisy, ary hatramin' ny nahitana ny Filazantsaran' i Tômasy izay apôkrifa.