Antrasita
.JPG)
Ny antrasita dia arintany mafy misy tahan-karbônina abony indrindra (eo anelanelan' ny 86 % sy 97 %) sy zavatra mora manjary etona indrindra amin' ny karazana arintany rehetra. Ny zavatra mora manjary etona ao dia 3,6 % ary ny lavenona 9,3 %. Arintany mafy miloko mainty na volombatolalaka sy manjelatra mamirapiratana toy ny metaly ny antrasita. Ny hakitroky ny antrasita dia eo anelanelan' ny 1,45 sy 1,75. Avo indrindra amin' ny karazana arintany rehetra ny hakitroky ny angovo ao aminy ary izy no laharana ambony indrindra amin' ny arintany. Na dia sarotra kokoa aza ny firehetan' ny antrasita raha ampitahaina amin' ny arintany hafa, ny antrasita dia mamoaka angovo be rehefa mirehitra ary mamoaka setroka sy molaly kely. Karazana arintany tsy mamoaka tara na ary tsy mamoaka etona hidrôkarbiora hafa ny antrasita rehefa hafanaina ambanin' ny maripana tokony mampirehitra azy. Sarotra mandray afo ary amoaka lelafo fohy miloko manga tsy misy setroka ny antrasita rehefa mirehira.
Notrandrahina voalohany indrindra nandritra ny taonjato faha-19 sy faha-20 ny antrasita. I Sina no mitana ny laharana voalohany amin' ny famokarana antrasita eran-tany; ny mpamokatra hafa dia i Rosia, i Okraina, i Kôrea Avaratra, i Kôrea Atsimo, i Afrika Atsimo, i Espaina, i Alemaina, i Vietnamy, ny Fanjakana Mitambatra, i Aostralia, i Kanada, ary i Etazonia. Ny antrasita dia 1 % amin' ny tahirin' arintany maneran-tany, ary any amin' ny firenena vitsivitsy eran' izao tontolo izao ihany no itrandrahana azy. Ny vokatra manontolo tamin' ny taona 2020 dia nahatratra 615 tapitrisa taonina.
Matetika izy io no ampiasaina ho fandrehitra sy loharano fakana karbônina indostrialy. Ny antrasita dia ampiasaina indrindra amin' ny famokarana herinaratra mahery vaika indrindra, ny tena fampiasana azy dia ao amin' ny sehatry ny fitrandrahana sy fikarakarana metaly (metalorjia).