Propithecus verreauxi
Ny Propithecus verreauxi na sifak' i Verreaux na sifa-bilany dia karazana sifaka fotsy fa mainty loha, ao amin' ny fianakaviana Indridae. Ity biby ity dia hita any amin' ny faritra atsimo-andrefana amin' i Madagasikara, izay tsy fahita afa-tsy eto amin' ny Nosy. Tena atahorana ho lany tamingana izy ireo na dia miely patrana aza. Iray amin' ny karazana sifaka sivy misy eto Madagasikara izy.
Toetoetrany[hanova | hanova ny fango]
Ny Propithecus verreauxi no kely vatana indrindra ao amin' ny Propithecus. Mirefy 40 ka hatramin’ ny 48 sm izy ary milanja 3 hatramin’ ny 3,5 kilao. Ny rambony, izay lava kokoa noho ny vatany, dia mahatratra 60 sm. Ny volo amin’ ny hodiny, izay matevina sy lava, dia miloko fotsy tanteraka, afa-tsy ilay faribolam-bolo mivolon-tany matroka eo an-tampon-dohany. Mainty ny tanany sy ny tongony ary ny tarehiny, ary ny volo kely eo amin' ny kibony dia mamela ny hodiny ho hita ary mampiloko volondavenona ny kibony.
Ny sasany amin’ ny Propithecus verreauxi dia misy faritra maizina eo amin' ny tratrany sy lamosiny ary amin’ ny lafiny anatiny amin' ny rantsam-batany. Ny Propithecus verreauxi dia noheverina ho zana-karazana miavaka taloha: Propithecus verreauxi majori, Rothschild, 1894. Hita ihany koa ny karazana Propithecus verreauxi fotsy tanteraka eo afovoan' ny vondrona manana loko mahazatra kokoa.
Mivondrona ho andiany misy biby 4 ka hatramin' ny 8 na lahy na vavy ny Propithecus verreauxi. Ny vavy no manjaka amin' ny lahy. Ny zana-tsifaka dia minono hatramin' ny faha enim-bolany. Ravina sy voan-kazo no tena fihinany, indraindray izy dia mihinana voninkazo na hodi-kazo sasany. Mihinana ravina tanora sy tsimoka izay be prôteinina izy ireo. Ny ranjony matanjaka no ahafahany mitsambikina amin’ ny hazo iray mankany amin’ ny hazo iray hafa. Eny amin’ ny tany izy dia afaka mitsambikina lavitra hatramin’ ny 4 metatra.
Tontolo misy azy[hanova | hanova ny fango]
Ny Propithecus verreauxi dia miaina amina faritra midadasika any atsimo sy any andrefana amin' i Madagasikara. Heverina fa ny avaratra indrindra amin’ ny faritra onenany dia ny renirano Tsiribihina, fa ny any atsimo-atsinanana kosa dia manodidina an’ i Tôlanaro. Na dia ahitana vondrona sifaka vitsivitsy aza ny Tahirin-javaboarin’ i Nahampoana, dia azo antoka fa nampidirina tao izy ireo satria tsy hita any amin' ny faritra hafa amin' ny ala trôpikaly toy izany.
Ny fonenany mahazatra dia ny ala mikitroka maina amin' ny toerana iva sy antonony (hatramin' ny 1 300 m) izay mandrakotra ireo faritra ireo. Hita ao anaty kirihitra tsilo, fatrana ary ala honko koa io karazana gidro io. Miovaova arakaraka ny tontolo onenany ny habetsahan' ny Propithecus verreauxi, na dia ny ala kely aza dia mety misy azy betsaka.