Fanelanelanan' ny olo-masina

"Amin' izao fankalazantsika ny andro nahaterahan' ity lehilahy lehibe ity izao, ilay mpialoha lalana ny Tompo, i Joany voatahy, dia aoka isika hangataka fanampiana amin' ny vavaka ataony. Satria sakaizan' ny mpampakatra izay hitanao izy, ka afaka mahazo ho antsika koa ny haha an' ny mpampakatra antsika, mba hatao miendrika hahazo ny fahasoavany isika". – Md Aogostino

Ny fanelanelanan' ny olo-masina dia fotopampianarana kristiana izay milaza fa afaka mifona amin' Andriamanitra ho an' ny hafa ny olo-masina. Ny manelanelana dia madroso na miverina eo anelanelan' ny andaniny sy ny ankilany, miangavy ny voalohany ho amin' ny tombontsan' ny faharoa. Amin' ny fampiasana ny teny hoe "manelanelana" sy "fanelanelanana" eo amin' ny sehatry ny fiangonana dia raisina amin' ny hevitry ny fidirana an-tsehatr' i Kristy, voalohany indrindra, ary faharoa amin' ny fidirana an-tsehatry ny Virjiny Masina sy ny anjely ary ny olo-masina, ho amin' ny anaran' ny olombelona sy ho amin' ny tombontsoany. Tohanan' ny Katôlika, ny Ôrtôdôksa Tatsinanana, ny Fiangonana Asiriana any Atsinanana, ny Ôrtôdôksa Atsinanana, ary ny Loterana sasany sy ny Anglikana (indrindra ny an' ny Eglizy Katôlika Evanjelika na Anglô-Katôlika) io fotopampianarana io. Hita ao amin' ny asasoratra kristiana nanomboka tamin' ny taonjato faha-3 ny fanao momba ny fangatahana ny fanelanelanan' ny olo-masina.

Ny Fanekem-pinoana Apôstôllika tamin' ny taonjato faha-4 dia milaza ny finoana ny fiombonan' ny olo-masina, izay heverin' ny fiangonana sasany ho manohana ny fanelanelanana ataon' ny olo-masina. Na izany aza, ny fanao mitovy amin' izany dia iadian-kevitra ao amin' ny jodaisma sy ny silamo ary ny prôtestantisma.