Siramamy
Ny siramamy dia akora (gliosida) manana tsiro mamy, mety levona, izay misy karazany maro, ary maro amin' izy ireo no ampiasaina amin' ny sakafo. Mety ho gliokôzy na froktôzy na galaktôzy ny siramamy tsotra, izay antsoina koa hoe mônôsakarida na ôzy. Môlekiola vita amin' ny mônôsakarida roa mifamatotra ny siramamy haro, izay antsoina koa hoe disakarida; ohatra mahazatra ny siokrôzy (gliokôzy + froktôzy) sy ny laktôzy (gliokôzy + galaktôzy) ary ny maltôzy (môlekiola roan' ny gliokôzy). Endrika voadio avy amin' ny siokrôzy ny siramamy fotsy. Mivadika ho siramamy tsotra ny siramamy haro rehefa ao amin' ny vatana.
Tsy heverina ho siramamy ny rojon' ny mônôsakarida lava kokoa (mihoatra ny roa) ary antsoina hoe ôligôsakarida na pôlisakarida. Pôlimera-na gliokôzy hita ao amin' ny zavamaniry ny tavolo, izay loharanon-kery lehibe indrindra ao amin' ny sakafon' olombelona. Mety hanana tsiro mamy ny akora simika hafa, toy ny etilenina glikôla, gliserôla ary alikaolan-tsiramamy, nefa tsy sokajiana ho siramamy.
Hita ao amin' ny vatan' ny ankamaroan' ny zavamaniry ny siramamy. Loharano voajanahary betsaka ho an' ny siramamy tsotra ny tantely sy ny voankazo. Hita indrindra ao amin' ny fary sy ao amin' ny betiravy fanaovan-tsiramamy ny siokrôzy, ka mahatonga azy ireo ho tsara indrindra amin' ny fitrandrahana ara-barotra mahomby amin' ny hahazoana siramamy voadio. Tamin' ny taona 2016, teo amin' ny roa lavitrisa taonina teo ho eo ny fitambaran' ny siramamy eran-tany azo avy amin' ireo vokatra roa ireo. Azo vokarina amin' ny alalan' ny fampitsaharana ny fitsimohan' ny voamadinika (anglisy: malt; frantsay: maltage) ny maltôzy. Ny laktôzy ihany no siramamy tsy azo avy amin' ny zavamaniry, tsy hita afa-tsy amin' ny ronono, anisan' izany ny rononon-dreny, sy amin' ny vokatra sasany vita amin' ny ronono. Loharan-tsiramamy mora vidy ny sirôn-katsaka, izay vokarina amin' ny fomba indostrialy amin' ny famadihana ny tavolon-katsaka ho siramamy, toy ny maltôzy, ny frioktôzy ary ny gliokôzy.
Ny siokrôzy dia ampiasaina amin' ny sakafo voaomana (ohatra: biskitra sy mofomamy), indraindray afanharo amin' ny sakafo sy zava-pisotro voaova tanteraka izay misy betsaka eny amin' ny varotra, sady indraindray ampiasaina ho fanomezana tsiro mamy ny zava-pihinana (ohatra: mofo manja sy voamadinika) sy ny zava-pisotro (ohatra, kafe sy dite). Mandany siramamy 24 kg eo ho eo isan-taona ny olona salantsalany. Mandany hatramin' ny 50 kg ny Amerika Tavaratra sy Amerika Tatsimo, ary mandany latsaky ny 20 kg ny Afrikana.
Rehefa nitombo ny fihinanana siramamy atovana tamin' ny faramparan' ny taonjato faha-20 dia nanomboka nandinika ny mpikaroka raha manimba ny fahasalaman' ny olombelona ny fihinanana siramamy, indrindra fa ny siramamy voadio. Tamin' ny taona 2015, ny Fikambanana Maneran-Tany momba ny Fahasalamana (izay fantatra amin' ny hoe OMS) dia nanoro hevitra mafy ny olon-dehibe sy ny ankizy mba hampihena ny fihinanana siramamy ho latsaky ny 10 % amin' ny totalin' ny angovo azo avy amin' izany ary mamporisika ny fampihenana ho latsaky ny 5 %. Amin' ny ankapobeny dia betsakaka kokoa ny voka-dratsin' ny fihinanana siramamy betsaka amin' ny ny fahasalaman' ny olombelona raha mitaha amin' ny tombontsoa ara-tsakafo mety ho azo avy amin' izany, ary misy ifandraisany amin' ny mety hisian' ny olana momba ny fo sy ny hatavezana ary ny fahasimbana hafa eo amin' ny fahasalamana izany.