Aotra

Ny 0, izay atao hoe aotra na zerô, dia isa maneho ny foana, izay sady tarehimarika no isa. Amin' ny maha tarehimarika azy dia ampiasaina izy io mba "hitazomana laharana" sy hanamarihana toerana foana (tsy misy zavatra) amin' ny fanoratana isa amin' ny fanoratana manaraka toerana.

Ny isa 0

Ao amin' ny matematika

Amin' ny maha isa azy, ny aotra dia zavatra matematika ahafahana manambara ny tsy fisiana izay aseho toy ny habetsahana foana: io no isan' ny singa ao amin' ny vondrona foana. Izy no kely indrindra amin' ny isa tsimivaky miabo na foana. Ny toetra aritmetikany manokana, indrindra fa ny tsy fahafahana manao fizarana amin' ny aotra, indraindray dia mahatonga azy hoheverina manokana. Izy io dia manasaraka ny isa voatsapa ho miabo sy miiba ary ampiasaina ho toy ny fiantombohana hitadiavana teboka amin' ny hitsy voatsapa.

Ao amin' ny aljebra, ny 0 dia matetika ampiasaina ho marika hanondroana ny singa moana ao amin' ny fanampiana amin' ny ankamaroan' ny vondrona abeliana. Izy io koa no singa mpifaoka ao amin' ny fampitomboana.

Tantara

Tany amin' ny taona 200 tal JK ny Babilôniana no efa nampiasa voalohany endriky ny tarehimarika aotra ao anatin' ny isa (ohatra: 304) fa tsy eo ankavanan' ny isa, na ankavia. I India no nandavorary ny isa tafolo. Tsy nampiasainy ho tarehimarika amin' ny fomba babilôniana ihany ny aotra, fa nampiasainy koa ho isa azo anaovana asamarika. Avy eo dia nindramina tamin' ny matematika arabo, izay nampita izany tany Eorôpa, ny hevitra sy ny fanoratana indiana ny aotra.

Tokony ho marihana koa ny toerana manokan' ny Maia, izay hany mpanao aritmetika tamin' ny Andro Taloha, izay namaritra aotra roa, ny iray ho enti-mamaritra isa ary ny iray hafa ho enti-mamaritra laharana, araka ny asehon' ny sary eo amin' ny lamosin' ny Takelak' i Leide.

Ny aotra na zerô ao amin' ny teny malagasy

Aotra sa zerô ?

Tsy nanana anarana isa hilazana ny foana ny teny malagasy nentim-paharazana fa nindrana teny avy any ivelany. Ny "aotra" dia nindramina avy amin' ny teny anglisy tamin' ny andron' ny misiônera britanika. Ny "zerô" dia nindramina tamin' ny teny anglisy ihany koa sady nohamafisin' ny teny frantsay nandritra ny fanjanahantany. Na izany aza, ireo izay nankasitraka kokoa ny Britanika sady nihevitra ny "zerô" ho mamofompofona Frantsay dia nisafidy ny hoe "aotra".

Fiavian' ny teny

Aotra

Nindramina amin' ny teny anglisy hoe ought na nought ny anarana hoe aotra. Amin' ny teny anglisy dia midika hoe "tsy misy" na "foana" ny "nought" sy "naught", fa midika hoe "rehetra" na "na inona na inona" kosa ny "ought" sy "aught", ary tsy anaran' ny isa 0. Na izany aza dia ampiasaina amin' ny teny anglisy amerikana izy ireo indraindray; ohatra, "aught" ampiasaina ho mpitazon-toerana ho an' ny zerô amin' ny fanononana ny laharan' ny taona.

Zerô

Nindramina avy amin' ny zéro frantsay ny anarana hoe zerô, izay avy amin' ny zero italiana (fanafohezana ny hoe zefiro), izay avy amin' ny teny latina hoe zephirum tamin' ny Andro Antenatenany, izay fanoratana amin' ny tarehin-tsoratra latina ny teny arabo hoe صفر / ṣĭfr, izay mifika hoe "foana".

Jereo koa

• aotra/zerô - isa/iray/iraika - roa - telo - efatra - dimy - enina - fito - valo - sivy
• folo - roapolo - telopolo - efapolo - dimampolo - enimpolo - fitopolo - valopolo - sivifolo

• zato - arivo - alina - hetsy - tapitrisa - lavitrisa
• Fanisana amin' ny teny malagasy - isa - tarehimarika - mpamaritra isa

Rohy ivelany

• Andriamihaja Solonavalona, "Fanisana vaovao", tenymalagasy.org
• "Manisa", motmalgache.org