Fanisana amin' ny teny malagasy
Ny fanisana amin' ny teny malagasy dia voanteny na andian-teny ampiasaina ho anaran' ny isa ao amin' ny fiteny malagasy. Amin' ny fitsipiteny dia atao hoe mpamaritra isa ireo voanteny sy andian-teny ireo. Ampiraisina amin' ny anarana ny mpamaritra isa izy ireo mba hilazana ny isa na laharan' ny zavatra lazaina amin' io anarana io.
Lisitry ny voanteny ampiasaina hilazana isa
[hanova | hanova ny fango]Soratana amin' ny voanteny tokana ny isa manomboka amin' ny aotra ka hatramin' ny folo, toy izany koa ny isa songatombon' ny folo (20, 30, ..., 90), ny songatombon' ny zato (200, 300, ..., 900), ary ny teny hoe arivo, alina, hetsy, tapitrisa, ary lavitrisa, ankoatry ny hafa.
Voanteny fampiasa matetika
[hanova | hanova ny fango]Inty ny lisitry ny isa soratana amin' ny voanteny tokana fampiasa matetika, izany hoe sady tsy misy tsipi-panohizana no tsy misy faingo mihantona ny fanoratana azy: aotra na zerô (0), isa na iray na iraika (1), roa (2), telo (3), efatra (4), dimy (5), enina (6), fito (7), valo (8), sivy (9), folo (10), roapolo (20), telopolo (30), efapolo (40), dimampolo (50), enimpolo (60), fitopolo (70), valopolo (80), sivifolo (90), zato (100), roanjato (200), telonjato (300), efajato (400), dimanjato (500), eninjato (600), fitonjato (700), valonjato (800), sivanjato (900), arivo (1 000), alina (10 000), hetsy (100 000), tapitrisa (1 000 000), lavitrisa (1 000 000 000)[1].
Voanteny tsy fahita matetika ilazana isa
[hanova | hanova ny fango]Inty ny lisitry ny isa soratana amin' ny voanteny tokana (sady tsy misy tsipi-panohizana no tsy misy faingo mihantona), izay tsy tena ampiasaina amin' ny fiteny andavanandro: safatsiroa (10 000 000), tsitamboisa (100 000 000), lavitrisa (1 000 000 000), alinkisa (10 000 000 000), tsipesimpesenina (100 000 000 000), tsitokotsiforohana (1 000 000 000 000), tsihitanoanoa (10 000 000 000 000).
Fanakambanana anaran' isa
[hanova | hanova ny fango]Isa latsaky ny zato
[hanova | hanova ny fango]Soratana amin' ny fanombohana amin' ny venty, arahin' ny teny hoe "ambin' ny", avy eo amin' ny teny hoe "folo" ny isa mihoatra ny folo ka hatramin' ny latsaky ny roapolo (11 -- 19): iraika ambin' ny folo (11), roa ambin' ny folo (12), telo ambin' ny folo (13), efatra ambin' ny folo (14), dimy ambin' ny folo (15), enina ambin' ny folo (16), fito ambin' ny folo (17), valo ambin' ny folo (18), ary sivy ambin' ny folo (19). Atomboka amin' ny fanoratana ny venty (iraika ... sivy) ny isa ankoatr' ireo etsy aloha ireo, arahin' ny teny hoe "amby", ary ny ampolony (ohatra: efatra amby telopolo (34), fito amby efapolo (47).
Isa mihoatra ny zato sy latsaka ny arivo
[hanova | hanova ny fango]Manomboka amin' ny fanoratana ny venty, mitohy amin' ny antokon' isa lehibe kokoa, ary ampifandraisina ny venty sy ny ampolony ary ny anjatony amin' ny alalan' ny teny hoe "amby" (hatramin' ny 999), ohatra: ohatra: sivy amby telopolo amby roanjato (239), sivy amby sivifolo amby sivanjato (999). Atohy amin' ny alalan' ny teny hoe "sy" ny isa lehibe kokoa noho ireo (ohatra: dimy amby sivifolo sy efajato sy fito arivo (7 495).
Songatombo mihoatra ny arivo
[hanova | hanova ny fango]- Ny songatombon' ny arivo dia soratana amin' ny fanombohana amin' ny isan' ny arivo,soratana avy eo ny teny hoe "arivo"; ohatra: roa arivo (2 000), telo arivo (3 000), efatra arivo (4 000), dimy arivo (5 000), ..., sivy arivo (9 000).
- Toy izany koa ny songatombon' ny alina, ohatra: roa alina (20 000), telo alina (30 000), efatra alina (40 000), ..., sivy alina (90 000).
- Toy izany koa ny songatombon' ny hetsy, ohatra: roa hetsy (200 000), telo hetsy (300 000), efatra hetsy (400 000), ..., sivy hetsy (900 000).
- Toy izany koa ny songatombon' ny tapitrisa; ohatra: roa tapitrisa (2 000 000), telo tapitrisa (3 000 000), efatra tapitrisa (4 000 000), ..., sivy tapitrisa (9 000 000), ... zato tapitrisa (100 000 000), sivinjato tapitrisa (900 000 000), ..., arivo lavitrisa (1 000 000 000), sns.
- Toy izany koa ny songatombon' ny lavitrisa; ohatra: roa lavitrisa (2 000 000 000), telo lavitrisa (3 000 000 000), efatra lavitrisa (4 000 000 000), ..., sivy lavitrisa (9 000 000 000), ... zato lavitrisa (100 000 000 000), ..., arivo lavitrisa (1 000 000 000 000), sivy arivo lavitrisa (9 000 000 000 000) sns.
Famintinana ny anaran' ny toraky ny folo
[hanova | hanova ny fango]Inty ny famintinana famintinana ny anaran' ny isa fototra amin' ny teny malagasy:
| Toraky ny folo | Anaran' ny isa | Tarehimarika | Anarana mahasolo azy | |
| 100 | Isa, iray, iraika | 1 | ||
| 101 | folo | 10 | ||
| 102 | zato | 100 | ||
| 103 | arivo | 1 000 | ||
| 104 | alina | 10 000 | ||
| 105 | hetsy | 100 000 | ||
| 106 | tapitrisa | 1 000 000 | ||
| 107 | safatsiroa | 10 000 000 | folo tapitrisa | |
| 108 | tsitamboisa | 100 000 000 | zato tapitrisa | |
| 109 | lavitrisa | 1 000 000 000 | arivo tapitrisa | |
| 1010 | alinkisa | 10 000 000 000 | folo lavitrisa | alina tapitrisa |
| 1011 | tsipesimpesenina | 100 000 000 000 | zato lavitrisa | hetsy tapitrisa |
| 1012 | tsitokotsiforohana | 1 000 000 000 000 | arivo lavitrisa | tapitrisa tapitrisa |
| 1013 | tsihitanoanoa | 10 000 000 000 000 | alina lavitrisa | folo tapitrisa tapitrisa |
Jereo koa
[hanova | hanova ny fango]Loharano sy fanamarihana
[hanova | hanova ny fango]- ↑ Misy ny mihevitra fa tsy mihoatra ny "tapitrisa", hono, ny voanteny tokana ampiasaina amin' ny fiteny malagasy ho enti-manisa, koa noho izany, amin' izy ireo dia tsy misy ny hoe "lavitrisa" sy ny ambonin' izany.