Nebokadnetsara II

Avy amin'i Wikipedia
(tonga teto avy amin'ny Nabokôdônôzôra II)
Ampahany amin' ilay antsoina hoe "Tsangambaton' ny Tilikambon' i Babela", mampiseho an' i Nebokadnetsara II eo ankavanana ary misy sarin' ny ziggurat tao Babilôna (ilay atao hoe Etemenanki) eo ankaviany

I Nebokadnetsara II na Nebokadnezara II na Nabokôdônôzôra II dia mpanjakan' i Babilôna tanelanelan' ny taona 605 sy 562 tal. J.K. Nitarika ny tafika babilôniana izy rehefa hifarana ny fitondran' i Nabopôlasara rainy ka tamin' ny taona 605 dia resiny tao Karkemisa ao Siria ny Egiptiana. Nanafika matetika niankandrefana tany Siria sy Palestina sy Egipta ary Arabia izy. Resiny ny tafik' i Jodà tamin' ny taona 597 tal. J.K. ka azony i Jerosalema ary nentiny ho babo any Babilôna ny mpanjaka Jôiakima sy ny vahoakany maro koa. Nisy ny fikomiana nanohitra azy tao amin' ny Fanjakan' i Jodà tamin' ny taona 599-587 tal. J.K. ka famaizana mahatsiravina no nasetrin' izany izay nanaovany sesitany Jiosy maro indray tany Babilôna. Nataony fahirano mandritra ny 13 taona ny tananan' i Tiro any Foinikia ary nanafika an' i Egipta koa izy tamin’ ny taona 568 tal J.K. Maty tamin' ny taona 562 tal J.K. i Nebokadnetsara ka i Avela-Mardoka (na Amela-Merodaka) no nandimby azy.

Ny anarany[hanova | hanova ny fango]

Amin' ny fiteny babilôniana dia Nabûkudurrîutsur no fiantsoana an' i Nebokadnetsara. Avy amin' ny fehezanteny akadiana hoe Nabou-kudurri-usur ny anaran' i Nebokadnetsara. Io dia midika hoe "Ry Nabu, arovy ny lahimatoako!". I Nabu dia andriamanitry ny fahendrena babilôniana sady zanaky ny andriamanitra Mardoka (Marduk). Ny Baiboly hebreo dia manao azy hoe נבכדנאצר / Nebukadné’tsar fa amin' ny teny grika kosa dia Ναβουχοδονόσωρ / Naboukhodonósôr. Ny Arabo dia manoratra hoe نبوخذنصر / Nibûḫaḏniṣṣar.

Ny Baiboly katôlika malagasy dia manoratra hoe Nabokôdônôzôra (manakaiky ny teny frantsay hoe Nabuchodonosor) fa ny Baiboly prôtestanta malagasy manao hoe Nebokadnezara (manakaiky ny teny anglisy hoe Nebuchadnezzar) ary ny Baiboly DIEM dia manao hoe Nebokadnetsara (manakaiky ny teny hebreo hoe Nebukadné’tsar).

Jereo koa[hanova | hanova ny fango]