Fiteny slava atsimo
Ny fiteny slava atsimo dia vondrom-piteny mandrafitra zana-pizaràn' ny fiteny slava (miaraka amin' ny fiteny slava andrefana sy fiteny slava atsinanana). Ampiasain' ny Slava Tatsimo any amin' ny Balkana ireo fiteny ireo. Mizara azy ireo ho vondrona telo lehibe, izay samy mizara ho karazana maromaro, ny manam-pahaizana momba ny fiteny: nanomboka tamin' ny faran' ny taonjato faha-20 dia nisy anaram-piteny ara-pôlitika vaovao mifanitsy amin' ny firenena efatra vao niforna. Ny fiteny serbô-krôaty (fiteny krôatiana, fiteny bôsniana, fiteny môntenegrina, fiteny serbiana) sy ny fiteny bolgariana-makedôniana (fiteny bolgara, fiteny makedôniana) ary ny fiteny slôvena (fiteny prekmora sy fiteny resiana) dia anisan' ny fianakaviam-piteny slava atsimo.
Fiteny sy vondrom-piteny slava atsimo
[hanova | hanova ny fango]
Fiteny slôveniana
[hanova | hanova ny fango]Ny vondrona slôveniana dia misy karazany enina, ao anatin' izany ny fiteny prekmora sy ny fiteny resiana. Ny fitambaran' ny mpiteny ity vondrona ity dia 2,2 tapitrisa, indrindra any Slôvenia, ary koa manodidina an' i Trieste any Italia sy Carinthia any Aotrisy.
Fiteny serbô-krôatiana
[hanova | hanova ny fango]Ny diasistema slava atsimo-afovoany (BKMS, fantatra ihany koa amin' ny hoe fiteny serbô-krôatiana") dia manana mpiteny 18,5 tapitrisa.
Fitenim-paritry ny fiteny serbô-krôatiana
[hanova | hanova ny fango]Amin' ny fomba fijerin' ny mpahay fiteny dia ahitana fitenim-paritra efatra lehibe ity fiteny ity, dia ny fiteny kaikaviana, fiteny tsakaviana, fiteny stôkaviana ary fiteny tôrlakiana.
- Fiteny stôkaviana
Ny fiteny stôkaviana no lehibe amin' ny fitenim-paritry ny fiteny serbô-krôatiana, ampiasaina ao amin' ny antsasak' i Krôasia (ao Slavônia), ao Zagora, ao Dubrovnik sy ny manodidina azy, any Herzegôvina, ao afovoan' i Bôsnia, ao Serbia amin' ny ampahany be (afa-tsy any amin' ny faritra kely any atsimo-atsinanana) ary any Môntenegrô. Io no fototra iorenan' ny fiteny manara-penitra isam-pirenena izay miisa efatra ( fiteny bôsniana, fiteny krôatiana, fiteny môntenegrina ary fiteny serbiana).
- Fiteny kaikaviana
Ampiasaina indrindra any Krôasia, ao amin' ny faritr' i Zagreb sy ao amin' ny faritr' i Hrvatsko Zagorje, ny fiteny kaikaviana. Ampiasaina eo akaikin' ny faritra an-tsisintany miaraka amin' i Aotrisy sy i Hôngria ny fitenim-paritra nisampana avy aminy.
- Fiteny tsakaviana
Tenenina indrindra ao Istria ny fiteny tsakaviana, nefa koa ampiasaina: ao Kvarner, ao Kvarnerić, ao Pokuplje, ao Gorski kotar, ao Gacka, ao Dalmatia amorontsiraka ary ao amin' ny vondro-nosy Dalmatiana (afa-tsy ny faritra Dubrovnik).
- Fiteny tôrlakiana
Fiteny serbô-krôatiana araka ny fomba fijery pôlitika
[hanova | hanova ny fango]Taorian' ny faharavan' i Iogôslavia dia samy nanome anarana ny endriky ny fiteny serbô-krôatiana ao aminy ny firenena efatra izay niforona.
- Fiteny bôsniana
Ny fiteny bôsniana dia ampiasain' ny olona 2,5 tapitrisa any Bôsnia-Herzegôvina.
- Fiteny krôatiana
ny fiteny krôatiana dia ampiasain' ny olona 7 tapitrisa any Krôasia sy Bôsnia-Herzegôvina.
- Fiteny môntenegrina
Ny fiteny môntenegrina dia antsoina koa hoe "fiteny serbiana" ao Môntenegrô, izay misy 63 % amin' ny olom-pirenena no nilaza fa miteny serbiana ary 22 % no nilaza fa miteny môntenegrô nandritra ny fanisam-bahoaka tamin' ny taona 2003, ary tao amin' ny fizaràna momba ny maha-izy, 43 % no nilaza ny tenany ho Môntenegrina, ary 32 % ho Serbiana, izay midika fa ny 21 % amin' ny olom-pirenena ao amin' io firenena io dia mamaritra ny tenany ho Môntenegrina miteny serbiana.
- Fiteny serbiana
Ny fiteny serbiana dia ampiasain' ny mpiteny 9 tapitrisa: 7,5 tapitrisa any Serbia, 1,5 tapitrisa any Bôsnia-Herzegôvina, any Môntenegrô ary any Krôasia.
Fiteny bolgariana-makedôniana
[hanova | hanova ny fango]Fiteny bolgariana
[hanova | hanova ny fango]Manana mpiteny 9 tapitrisa ny fiteny bolgariana, indrindra any Bolgaria sy any Makedônia Avaratra ary any Grisia.
Fiteny makedôniana
[hanova | hanova ny fango]Manana mpiteny 2,5 tapitrisa ny fiteny makedôniana, indrindra ao Makedônia Avaratra, ary heverina ho fitenim-paritry ny fiteny bolgariana indraindray.*