Fiteny bôsniana
Ny fiteny bôsniana, indraindray antsoina hoe fiteny bôsniaka, dia iray amin' ny karazany manara-penitra amin' ny fiteny antsoin' ny manam-pahaizana sasany hoe fiteny serbô-krôatiana ary ny hafa - diasistema slava atsimo-afovoany, na fiteny stôkaviana, na sktôkaviana vaovao, na BKMS (bôsniana-krôatiana-môntenegrina-serbiana). Amin' ny fiteny bôsniana izy dia atao hoe bosanski jezik ("fiteny bosniana"), bošnjački jezik ("fiteny bôsniaka"), štokavski jezik ("fiteny stôkaviana"), standardni novoštokavski ("stôkaviana vaovao").
Amin' ny fomba fijerin' ny sôsiôlingistika, ny BKMS dia fiteny Abstand, izany hoe, fiteny araka ny fomba fijerin' ny haifiteny mampitaha ihany koa, iraisan' ny Bôsniaka, ny Krôatiana, ny Serbiana ary ny Môntenegrina, izay mifototra amin' ny endri-piteny stôkaviana. Avy amin' ny fomba fijery sôsiôlingistka hatrany, ny fiteny bôsniana, ny fiteny krôatiana, ny fiteny serbiana ary ny fiteny môntenegrina dia fiteny Ausbau, izany hoe fiteny noho io fomba fijery io ihany, samy manana ny fenitra manokana, nefa tsy fiteny miavaka amin' ny fomba fijerin' ny haifiteny mampitaha.
Nanomboka tamin' ny taompolo 1990 ny fampanaraham-penitra, taorian' ny nandravana an' i Iogôslavia. Ny manam-pahaizana momba ny fiteny miasa ao dia nikatsaka ny hanavaka ny fenitrany amin' ny hafa, indrindra amin' ny fanondroana ny teny mitovy hevitra avy amin' ny fiteny tiorka sy ny fiteny arabo ary ny fiteny persiana izay misy ao amin' ilay fiteny ho an' ny teny avy amin' ny fiteny slava. Sahala amin' ny karazany hafa amin' ilay fiteny iraisana, ny fiteny bôsniana dia fiteny ôfisialy ihany koa.