Apôkalipsin' i Zefania
Ny Apôkalipsin' i Zefania na Apôkalipsin' i Sôfônia dia bokim-paminaniana apôkaliptika izay ataon' ny mpanoratra azy hoe nosoratan' ny mpaminany Zefania (na Sôfônia) nefa tsy anisan' ny Baiboly (fa apôkrifa na pseodepigrafa) na dia misy ifandraisany amin' ny Testamenta Taloha sy ny boky apôkrifa hafa aza.
Fotoana sy toerana nanoratana azy
[hanova | hanova ny fango]Noho ny Apôkalipsin' i Zefania misy filazana ny amin' i Sozana (ilay voaresaka ao amin' ny Bokin' i Daniela endriny katôlika) dia heverina fa voasoratra taorian' ny taona 100 tal. J.K. Nahafantatra ny fisian' io boky io koa i Klemento avy any Aleksandria ka noho izany dia tokony ho voasoratra tany alohan' ny fahefatra faran' ny taonjato faha-2[1]. I Wintermute[2] dia mihevitra fa voasoratra talohan' ny taona 70 io boky apôkaliptika io noho izy manao tsiahy fomba nolovana momba ny Edômita.
Tsy ahitana soratra mitovy amin' ny an' ny Kristiana manokana ny ao, ary ireo izay mampahatsiahy ny ao amin' ny Testamenta Vaovao dia azo ampiharina ihany koa amin' ny zava-nitranga teo amin' ny Jiosy. Noho izany dia mety ho Jiosy no nanoratra azy nefa mety nisy fanovana nataona Kristiana[3]. Tao Egipta no toerana mety nipoirany.
Teôlôjian' ny Apôkalipsin' i Zefania
[hanova | hanova ny fango]Ny Apôkalipsin' i Zefania, izay misy fanambaràna mitovy amin' ny an' ny Bokin' i Henôka, dia maneho fa ny fanahin' ny olombelona dia velona any aorian' ny fahafatesana. Avahany tsara ny fitsarana ny olona tsirairay raha vantany vao maty, sy ny fitsarana farany izay hotanterahin' Andriamanitra. Aorian' ny fahafatesana dia halain' ny anjelin' i Satana sy ny anjelin' Andriamanitra ny fanahin' ny lolombelona ka hotsaraina araka ny vesatry ny asa tsara sy ny fahotana nataony nandritra ny androm-piainany. Izany dia midika fa misy akony teo amin' ny Apôkalipsin' i Zefania ny fampianaran' ny Fariseo (na Farizianiana). Hiditra any amin' ny fiadanana na any amin' ny fanasaziana ny fanahin' ny olona raha vantany voatsara amin' ny fitsarana voalohany, eo am-piandrasana ny fiavian' ny Tompo, nefa ny fanelanelanan' ny olomasina dia mety hahatonga ny fanasaziana tsy ho raikitra. Tsy mitovy amin' izay ambaran' ny boky hafa nitovy fotoana nisehoana tamin' ny Apôkalipsin' i Zefania izany faminaniana izany. Ohatra amin' izany ny hita ao amin' ny Boky faharoan' i Henôka.