Zefania (mpaminany)

Avy amin'i Wikipedia
Sauter à la navigation Sauter à la recherche
Miteny amin'ny vahoaka i Zefania, sary tao Frantsa, taonjato faha-16.

I Zefania na Sôfônia dia mpaminany hebreo voaresaka ao amin'ny Baiboly. Naminany tamin’ny nanjakan'i Josia tao amin'ny Fanjakan'i Joda (640-609 tal. J.K.) izy, tamin'ny andron'ny mpaminany Jeremia. Nanohitra ny fanaon'ny firenena vahiny sy ny fivavahana amin’ny andriamani-tsy izy ny mpaminany sady nanakiana ny fomba ratsin'ny mpitondra. Nitoriteny tao Jerosalema izy tamin’ny taona 640-630 tal. J.K., taloha kelin’ny fotoana niasan’i Jeremia.

Tamin'ny fotoana nanjakan'i Amona sy Manase tao amin'ny Fanjakan'i Joda, ny fivavahana amin'ireo andriamanitra vahiny, toa an'i Bala sy i Astarte, dia nandroso tao Jerosalema, izay nampiditra fanao vahiny. I Josia, ilay mpanjaka nanavao ny fivavahana, dia nikasa hampijanona izany fanao ratsy izany. Isan'ny nafana fo tamin'ireo mpanolo-tsaina ny amin'ity fanavaozana ity i Zefania.

Nanohitra ny fivavahana sy ny fitondran-tena ratsy ny mpaminany Zefania. Ka raha hitany ny fanompoan-tsampy izay efa tafiditra hatrao amin'ny toerana masina, dia nampitandrina izy fa handrava ny sisa amin'i Bala sy ny anaran'ny mpisorona amin'izany toerana izany Andriamanitra. Nitaky ny hiverenan'ny vahoaka amin'ny fahatsoram-piainan'ireo razany fa tsy ny aingitraingitry ny fitafiana vahiny izay nitafian'ireo ambony saranga ny mpaminany.

Ny mpaminany Zefania no atao hoe nanoratra ny Bokin'i Zefania.