Volta Noire

Avy amin'i Wikipedia
Ny renirano Volta Noire eo akaikin' i Dédougou
Ny ony Volta sy ny renirano Volta Noire (na Mouhoun) sy Volta Blanche (na Nakambé) ary Volta Rouge (na Nazinon) ary ny firenena lalovany sy manodidina azy

I Volta Noire (antsoina hoe Mouhoun any Borkina Fasô) dia renirano any Afrika Andrefana mamakivaky an' i Borkina Fasô sy i Kôtidivoara ary i Ganà. Iray amin' ny sakeli-dranon' ny ony Volta izy. Efa ho 1 000 km ny halavany manontolo. Saika ny ampahatelon' ny faritra andrefana amin' i Borkina Fasô no misy ny sahan-dranony.

Ao Borkina Fasô, atsimo-andrefan' ny tanànan' i Bobo-Dioulasso, no ipoiran’ ny loharanon’ i Mouhoun, ary miodina avaratra-atsinanana izy amin' ny voalohany, mifanandrify amin' ny sisintanin’ i Maly. Rehefa tonga tandrify ny tanànan' i Kouri izy dia manomboka miolakolaka ka mahatonga azy hizotra mianatsimo, hiampita avy any avaratra mankany atsimo amin’ ilay firenena. Any atsimo izy dia manatona ny tanim-pirenen' i Ganà, ka amin' ny voalohany dia namorona ampahany amin' ny sisin-tany eo anelanelan' i Borkina Fasô sy i Ganà.

Rehefa miala amin'ny taninin’ i Borkina Fasô izy dia lasa sisintany manasarka an’ i Ganà sy i Kôtidivoara aloha. Miala amin' ny tanin' i Kôtidivoara izy dia miditra ao amin' ny tanin’ i Ganà, manomboka manao olika izay mitondra azy mankany atsinanana ary avy eo mankany avaratra-atsinanana. Rehefa avy nivezivezy imbetsaka i Volta Noire dia mivarina ao amin’ ny farihy Volta ao Ganà, ka mampifangaro ny ranony amin’ ny an’ i Volta Blanche (na Nakambé). Aorian' ny fihaonanana eo amin' i Volta Noire sy i Volta Blanche, fihaonanana difotr’ ilay farihy ankehitriny, no tena nanomboka ny ony Volta.

Avy any Maly i Sourou (ilany havia) izay mandrafitra ny sisintany manasaraka ny firenena roa tonta mihoatra ny 15 km eo ho eo. Misy tohodrano ny ao amin' ny tanin' i Borkina Fasô, eo amin' ny fihaonany amin' i Volta Noire, izay mitahiry rano 250 hatramin' ny 500 tapitrisa metatra toratelo. I Sourou dia renirano manokana; raha ny marina dia sampan’ i Volta Noire ihany koa izy io: mandritra ny tondra-drano isan-taona, ny faritra ambany ao aminy dia vakivakin’ ny ranon' i Volta Noire avy any ambany mankany ambony. Noho ny fisian’ ilay tohodrano dia voatahiry ho amin’ ny vanim-potoanan’ ny main-tany io rano tondraka io.

Jereo koa[hanova | hanova ny fango]