Limbo

Avy amin'i Wikipedia
Sauter à la navigation Sauter à la recherche
Fidinan'i Kristy tany amin'ny Limbo, sary nataon'i Domenico Beccafumi;

Ny limbo, ao amin'ny foto-pampianarana katolika dia toe-javatra any an-koatra izay eo an-tsisin'ny fonenan'ny maty. Amin'ny heviny miitatra dia manondro ny toe-javatra anelanelany sy manjavozavo ao amin'ny tontolon'ny maty izany. Atao hoe limbus ny teny nohagasina hoe limbo amin'ny teny latina. Tsy hita ao amin'ny Baiboly sady tsy hita koa ao amin'ny soratr'ireo Aban'ny Eglizy (na Rain'ny Fiangonana) ny hoe limbo. Tamin'ny taonjato faha-13 io fampianarana io no nipoitra tao amin'ny fiheverana skolastika, izay manavaka limbo roa, dia ny limbon'ny Patriarka (limbus patrum) sy ny limbon'ny zazakely (latina: limbus puerorum).

Karazana limbo[hanova | hanova ny fango]

Ny limbon'ny Patriarka[hanova | hanova ny fango]

Ny limbon'ny Patriarka dia toerana andraisana ny fanahin'ny olo-marina maty talohan'ny fitsanganan'i Jesoa Kristy tamin'ny maty. Mifandray amin'ny "tratran'i Abrahama" resahina ao amin'ny Evanjelin'i Lioka (Lio 16.22) izany. Ireo fanahy ireo, izay tsy afaka miditra any am-paradisa voahidy sy voatombokase hatramin'ny nanotan'i Adama sy Eva, dia nafahan'i Jesoa tamin'ny nidinany tany amin'ny fitoeran'ny maty teo anelanelan'ny Zoma Masina sy ny andron'ny Paka (na Paska). Ny lovantsofina skolastika dia miorina amin'ny Taratasy voalohany nosoratan'i Piera (1Piera 3.19), izay milaza ny "nandehanany [i Jesoa] nitory teny tamin' ireo fanahy tao an-tranomaizina". Maro ny fitantarana sy lahatsoratra tamin'ny Andro Antenantenany izay nanampy amin'ny fitantarana ny fijalian'i Kristy ny fidinany tany amin'ny fonenan'ny maty (na fiainan-tsy hita).

Ny libon'ny zazakely[hanova | hanova ny fango]

Ny limbon'ny zazakely dia toerana andraisana ny fanahin'ny zazakely maty talohany hanaovana batemy (na batisa) azy. Izany fampianarana izany dia valin-teny teolojika amin'ny fanontaniana momba ny hoavin'ireo fanahy ireo, izay tsy mendrika ny afobe, nefa tsy tafiditra ao am-paradisa noho ny fahotana tamin'ny fototra. Izany fanontaniana izany, izay efa nitranga tamin'ny vanimpotona voalohany nisian'ny fivavahana kristiana, dia nahazo valiny manjavonjavo tamin'ireo Aban'ny Eglizy toa an'i Gregorio avy any Nisa sy Gregorio avy any Nazianzo.

Jereo koa[hanova | hanova ny fango]