Kristianisma ao amin' ny Repoblika Demôkratikan' i Kôngô

Ny kristianisma ao amin' ny Repoblika Demôkratikan' i Kôngô no fivavahana be mpanaraka indrindra ao amin' io firenena io. Tombanana any amin' ny 63 tapitrisa ny isan' ny Kristiana ao, araka ny Pew Research Center, ka ny 95,7 %n' ny mponina izany, na 2,9 %n' ny Kristiana maneran-tany. Ny tantaran' ny kristianisma ao amin' ny Repoblika Demôkratikan' i Kôngô dia mifamatotra amin' ny tantaran' ny fanjanahan-tany aorôpeana. Ny ankamaroan’ ny mponina ao amin’ ny Repoblika Demôkratikan' i Kôngô dia Kristiana ka ny 50 % amin' izany dia Katôlika ary ny 20 % Prôtestanta ary ny 10% Kimnbangista sy mpino ao amin' ny sekta hafa.

Ny fiangonana nampidirin' ny misionera

Ny katôlisisma

Tamin' ny fiantombohan' ny taonjato faha-16, tamin' ny andro najakan' i Nzinga Mbembe, dia lasa fivavaham-panjakana ny katôlisisma, izay nampidirin' ireo Zezoita. Tsy ny Zezoita ihany anefa no nanatanteraka ny asan' ny misionera fa tao koa ny Fransiskanina, ny Dôminikanina, sy ny maro hafa. Ankehitriny dia Katôlika ny mponina kôngôley miisa 35 000 000 any ho any, izany hoe manakaiky ny antsasaky ny isan' ny vahoaka kôngôley (50 %).

Ny prôtestantisma

Ny misiona prôtestanta tao Kôngô voalohany dia nalefan' ny British Baptist Missionary Society izay tonga tao tamin'ny taona 1878. Tamin' ny taona 2016 dia tombanana ho ny 20 %n' ny vahoaka ao amin' ny Repoblika Demôkratikan’ i Kôngô no Prôtestanta, ka tsy isan' izany ny Kibangista.

Ny fiangonana afrikana mahaleotena

Ireo fiangonana mahaleotena afrikana dia naorin' ny Afrikana tsy nisy fandraisana anjaran' ny misionera eorôpeana. Arahin' ny 13,5 %n' ny mponina ao amin' ny Repoblika Demôkratikan’ i Kôngô ireo karazam-pivavahana ireo, ka saika izy rehetra ireo dia manaraka ny kimbangisma, fa ny hafa manaraka ny jamaa sy ny kitawala, sns.

Ny kibangisma

Efa tamin' ny andron' ny fanjanahan-tany no nanorenan' i Simon Kimbangu ny fivavahany (6 Avrily 1921). Nenjehin' ny mpanjana-tany fatratra izany fivavahana izany izay nanohitra azy ireo. Taorian' ny fahazoan' ny Repoblika Demôkratikan' i Kôngô ny fahaleovan-tena dia noraisin' i Mobutu Sese Seko ho fivavahany ny kimbangisma ka nosalorany sata ôfisialy. Tsy misotro toaka, tsy mifoka sigara, tsy manao herisetra ary tsy mampirafy ny Kibangsta. Ny 13 %n' ny vahoaka ao amin'ny Repoblika Demôkratikan' i Kôngô ankehitriny dia manaraka ny kibangisma.

Ny Jamaa

Ny hetsika jamaa (izay midika hoe "fianakaviana" amin' ny teny soahily) dia sektan' ny kristianisma afrikana izay nifototra amin' ny katôlisisma. I Placide Tempels, izay pretra fransiskanina flamanda, no nanorina azy. Na dia eken' ny Eglizy katôlika rômanina aza io fiangonana io, sady mandray anjara amin' ny fiainan' ny paroasy aza ny mpino ao aminy, dia mampametra-panontaniana matetika ny fombany izay mihataka amin' ny finoana sy ny fanao katôlika.

Ny Kitawala

Ny hetsika Kitawala izay milaza ny tenany ho "hetsika ao amin' ny Tilikambo Fiambenana", dia niseho volohany tao amin' ny faritanin' i Katanga tamin' ireo taona 1920. Ny fitakiana ny fahaleovan-tenan' ny Repoblika Demôkratikan’ i Kôngô no isan' ireo antom-piforonany tamin' izay. Tsy isan' ny Vavolombelon' i Jehovah izy ireo na dia mampiasa ny asa sorany aza. Isan' ny fahasamihafana lehibe misy eo amin' ny Kitawala sy ny Vavombelon' i Jehovah dia ireto farany tsy manao pôliltika. Miady amin' ny famosaviana sy ny fialaovana ody ny Kitawala sady mitory ny fisian' Andriamanitra mainty hoditra. Tsy mety manaja ny sainam-pirenena sy tsy mety mandoa hetra ny mpino ao amin' ny Kitawala.

Ny fivavahana kristiana hafa

Ny fivavahana kristiana hafa dia arahin' ny 1 %n' ny mponina (Olomasin' ny Andro Farany, sns).

Ny Olomasin' ny Andro Farany

Ireo misiônera môrmôna voalohany dia tonga tao amin' ny Repoblika Demôkratikan’ i Kôngô tamin' ny taona 1986. Ankehitriny dia miisa 34 547 ny Olomasin' ny Andro Farany ao amin' io firenena io, izay manana fiangonana isan-toerana (kôngregasiôna) miisa 116.