Angiospermae
Ny Angiospermae dia zavamaniry misy lalan-dranon-kazo (Tracheophyta) ao amin' ny vondrona Spermatophyta (zavamaniry misy vihy). Ireo zavamaniry ireo, izay maniry voniny sy voany, dia matetika antsoina hoe "zavamaniry mamony" na "zavamaniry mamelana".
Ny hoe "Angiosperma" dia avy amin' ny teny grika hoe ἀγγεῖον / angeīon, "fitahirizana", sy σπέρμα / spérma, "voa", "vihy" ary midika hoe "vihy anaty fitoeran-javatra" - mifanohitra amin' ny Gymnospermae ("voa miboridana") izay vondrona mifanila aminy.
Anisan' izy ireo ny ankamaroan' ny karazan-javamaniry eto an-tany (90 % hatramin' ny 96 % amin' ny zavamaniry ivelan' ny ranomasina), izay ahitana karazana efa ho 319 000 voarakitra tamin' ny taona 2015, satria efa ho 2 000 ny karazana vaovao hita isan-taona. Mizara ho Dicotyledonae sy Monocotyledonae ny Angiospermae.
Ireto ny fianakaviana lehibe indrindra: ny Asteraceae (na Compositae) izay mihoatra ny 10 % amin' ny zavamaniry mamelana, ny Orchidaceae (na ôrkide) efa ho 9 %, ny Fabaceae (na Leguminosae) mihoatra ny 6 %, ny Rubiaceae mihoatra kely ny 4 %, ny Poaceae (na ahitra) 3,5 %, ny Lamiaceae (na Labiaceae) saika 2,5 % ary Euphorbiaceae 2%.
Tsy mitovy amin' ny zavamaniry misy vihy hafa ny Angiospermae noho ny fisian' ireto toetra manaraka ireto:
- ny fitambaran' ny taovam-pananahana ao amin' ny voninkazo;
- ny fisian' ny fihary atodinaina mandrakotra ny tsirivavy, izay mivoatra ho voa;
- ny fitsaihan' ny atody indroa, izay mahatonga ny fanjary tsaika sy ny tambatsela manome sakafo azy, ny tahirim-bihy (albumen).
Ny vony sy ny voa, izay mampiavaka an' ity vondrona ity, dia miteraka, ho an' ny karazana maro, fifaneraseran' ilay zavamaniry amin' ny biby momba ny fananahana (ny famindrana vovobony ataon' ny bibikely, ny fanaparitahana ny vihy, sns.).
Manjaka amin' ny tontolo voajanahary trôpikaly sy antonony, toy ny hivoka na ny ala, ny Angiospermae. Manome toerana ho an' ny kônifera (Pinophyta) sy ny volombato izy ireo, ao amin' ny biôtôpy mangatsiaka indrindra. Hita any amin' ny tontolo anaty rano (Zostera, sns.) koa izy ireo.