Aloalo

Ny aloalo dia hazo voasokitra avy aty ambany hatrany ambony izay entina anaingoana ny fasana any amin' ny faritra mahafaly sy karimbola ary tandroy (indrindra ny tapany andrefana), ka matetika ahitana sarin' omby na sarin' olona ny eny amin' ny tampony. Matetika ny aloalo eny amin' ny fasana mahafaly na antandroy dia hodidinin' ny tandrok' omby novonona tamin' ny fanamboaram-pasana sy ny fandevenana. Ahitana aloalo koa tsindraindray ny fasan' ny Sakalava. Ao amin' ny Bara dia mety ho sary sokitra tsotra maneho sarin' olona iray ny aloalo.

Ny aloalo eny am-pasana

Fanamboarana aloalo

Tsy dia mampiasa loko ny mpanamboatra aloalo, ny hany loko ampiasana dia ny mainty (matetika azo amin' ny alalan' ny fandoroana ny hazo) ny aloalo mahafaly na antandroy, ka ny fisokirana ilay hazo no manome loko mazava mampisongadina ny sary voasokitra. Voasokitra maneho sary misy zorozorony na kiboribory sisina ny tapany ambanin' ny aloalo. Mety hahitana sarin' olona mitanjaka sy sarim-borona koa ny eny amin' ny tampon' ny aloalo.

Ny aloalo tranainy indrindra dia tamin' ny fiandohan' ny taonjato faha-18 ary tsy mahakasika afa-tsy foko vitsy ihany. Saika sarin' omby sy vorona ihany no nasehon' izy ireo tamin' izany fotoana izany. Tsy mampiseho sary vetaveta ireo aloalo ireo, tsy toy ny sary sokitra fandevenana any amin' ny faritry ny Sakalavan' i Menabe.

Araka ny fomba dia omena omby ny mpanao sary sokitra, ka mety mahatratra hatramin' ny omby dimy izany raha tena tsara ny aloalo vita.

Isankarazany ny endriky ny aloalo amin' izao fotoana izao ka matetika voaloko mamirapiratra, maneho sehatra samihafa momba ny fiainan' ny maty, mifandray amin' ny sary ara-jeômetria mifandimbindimby. Azo raisina ho anisan' ny fanehoana ny zakantom-bahoaka malagasy ny aloalo.

Fampiasana ny aloalo

Ny Mahafaly sy ny Antandroy dia tsy mampiasa aloalo afa-tsy eny am-pasana. Miankina amin' ny haren' ilay olona maty ny habetsahan' ny aloalo sy ny tandrok' omby mitsatoka eny amin' ny fasany. Mamintina ny tantaran' ilay olona milevina ao amin' ilay fasana ny sary aseho amin' ny alalan' ny aloalo, ka mahakasika ny toerany teo amin' ny fiarahamonina izany (fananany omby maro, sns).

Ny aloalo ankehitriny

Toerana ahitana azy

Tafiditra an-tanàna ny aloalo

Raha tsy hita afa-tsy teny amin' ny fasana sady ivelan' ny tanàna ny aloalo taloha, amin' izao fotoana izao dia hita any an-tokantranon' olona izany. Fanampin' izany, raha any amin' ny faritra atsimon' i Madagasikara no nanao ny asa sokitra aloalo dia efa lasa fitadiavam-bolan' ny Malagasy maro ny fanamboarana izany mba hamidy hatao haingon-trano na haingon-tokontany. Ahitana aloalo ny any amin' ny trano fonenana na any amin' ny zaridainan' ny trano fandraisam-bahiny, toy ny hita ao Toliara.

Tonga hatrany andafy ny aloalo

Matetika ny mpizaha tany dia mividy aloalo mba hataony fahatsiarovana rehefa miveerina mody avy aty Madagasikara. Vokatr' izany dia mitranga indraindray ny fanazimbazimbana ny fasana amin' ny alalan' ny fangalarana aloalo eny amin' ny fasana, indrindra ny aloalo tranainy.

Tsy ny hazo ihany no akora anamboarana aloalo

Jereo koa

Fanovozan-kevitra

Rohy ivelany

"Aloalo", motmalgache.org
"Aloalo : l’ une des cultures traditionelles malgaches", www.madagascar-vision.com
"Aloalo", www.pinterest.fr
"L'art funéraire mahafaly (PDF)", madagascar-unesco.com
"Aloalo", gettyimages.fr
"Connaissez-vous l’Aloalo Malagasy ?", www.vol-direct.net
"Madagascar – culture: l'aloalo s'expose à New York et à Paris", madagascar-tourisme.com
"La place de l'Aloalo dans la culture Mahafaly", www.vol-direct.net