Ateisma
Ny ateisma dia ny tsy fananana ny finoana na ny fandavana ny finoana ny fisian' ny andriamanitra na Andriamanitra izay mety hiseho eo amin' ny lafiny filôzôfika na ara-piarahamonina na ara-pôlitika. Mifanohitra amin' ny teisma (finoana ny fisian' ny andriamanitra na Andriamanitra) ny ateisma. Tsy sahala amin' io hatrizay ny famaritana ny ateisma fa nivoatra.
Fifironan-teny sy hevi-teny
[hanova | hanova ny fango]Ny teny hoe ateisma dia teny vahiny nohagasina (frantsay: athéisme; anglisy: atheism) avy amin' ny mpamari-toetra grika hoe ἄθεος / atheos izay fitambaran' ny tovona ἀ- / a- (izay manambara tsy fisiana na tsy fananana) sy ny anarana hoe θεός / theos ("andriamanitra") ka midika ara-bakiteny hoe "tsy manana andriamanitra" na "tsy misy andriamanitra". Tamin' ny taonjato faha-5 tal. J.K. dia niita-kevitra io teny io ka lasa nilazana ny fahatapahan' ny fifandraisana amin' ny andriamanitra na ny fandavana ny andriamanitra. Taty aoriana dia nivoatra ihany ny hevitr' ilay teny ka nilazana ny olona heverina fa tsy manana ny andriamanitra tena izy na an' ilay Andriamanitra tena izy: tamin' ny vanim-potoana nanombohan' ny fielezan' ny kristianisma izany; ka ny Kristiana manao ireo tsy kristiana ho "atheos" ary ny mpanaraka ny fivavahan' ny jentilisa nanao ny Kristiana ho "atheos" koa.