Sora (Baiboly)
I Sora dia toerana resahina imbetsaka ao amin' ny Baiboly hebreo. Atao hoe שור / Šūr izy amin' ny teny hebreo.
I James K. Hoffmeier dia mino fa ny "lalan' i Sora" dia teo amoron' i Wadi Tumilat — tany azo volena any atsinanan' ny Vinanin' i Nily, izay lalana fandalovana eo anelanelan' i Ejipta sy i Kanaana mamakivaky ny Saikinosin' i Sinay[1].
Rehefa nandositra an' i Saray (vadin' i Abrama, tompon' i Hagara) i Hagara, dia "nahita azy ny Anjelin' ny Tompo ... teo anilan' ny fantsakana amin' ny lalana mankany Sora" (Genesisy 16:7).
Voaresaka ao amin' ny 1Samoela 15:7 koa i Sora: "Ary i Saoly namono ny Amalekita hatrany Havila ka hatrany Sora, any atsinanan' i Ejipta". Araka ny Bokin' ny Eksôdôsy (Eks 15:22–23 ), dia any amin' ny "efitr' i Sora" no misy an' i Mara.
Milaza ny Easton's Bible Dictionary (1893) fa i Sora dia angamba ampahany amin' ny tany efitr' i Arabo, eo amin' ny sisin-tany avaratra-atsinanan' i Ejipta, izay manome ny anarany ny efitra iray manomboka any Ejipta ka hatrany Filistia (Gen. 16:7; 20:1; 25:18; Eks. 15:22).
Azo inoana fa ny fiantsoana azy dia avy amin' ny manda naorin' ny Ejipsiana, izay natao mba hiarovana ny sisin-taniny any avaratra-atsinanana tamin' ireo fokom-pirenena any an-tany efitra. Ity rindrina na tsipika mimanda ity dia avy any Pelosioma ka hatrany Heliôpôlisy.
Loharano sy fanamarihana[hanova | hanova ny fango]
- ↑ James K. Hoffmeier, "Major Geographical Issues in the Accounts of the Exodus". In Israel: Ancient Kingdom Or Late Invention? Daniel Isaac Block, ed. B&H Publishing Group, 2008 ISBN 0805446796