Manga

Ny manga dia voankazo avy amin' ny zavamaniry mitovy anarana aminy, antsoina amin' ny anarana ara-tsiansa hoe Mangifera indica, hazo ao amin' ny fianankaviana Anacardiaceae. Avy any India ny manga, ary volena eny amin' ny faritra manana toetanin-jana-pehin-tany manerana ny tany. Anisan' ny voakazo vokarina noho ny ranony, noho ny tsirony ary noho ny lokony ny manga.

Ny teny malagasy hoe manga dia avy amin' ny teny pôrtogey hoe manga, izay avy amin' ny teny malaialamo hoe മാങ്ങ / māṅga, izay avy amin' ny teny tamoly hoe மாங்காய், māṅgā,

Toetoetrany

Afaka telo hatramin' ny enim-bolana ny manga vao masaka. Miovaova ny hangeza sy ny lokon' ny manga masaka, mety mavo, laoranjy, mena na maintso rehefa masaka, araka ny karazany. Rehefa masaka ny manga, dia misy fofona mampiavaka azy manokana avoakany.

Fampiasana amin' ny fitsaboana sy ny fahasalamana

Mamelombelona sy manampy amin' ny fanaretana

Be vitaminina A sy C ary E, tsiraka, sira mineraly ary haro fiarovana toy ny pôlifenôla sy karôtenôida ary mangiferinina ny manga. Noho ireo singa ao aminy ireo dia heverina ho voankazo mamelombelona sy manatanjaka ny manga, matetika atolotra hohanina mandritra ny fotoanan' ny harerahana, ny faneratana (alohan' ny fahasitranana tanteraka), ny tsy fahampian-drano, na ny hafanana. Amin' ny fomban-drazana sasany dia ampiasaina ho zava-pisotro mahasitrana haingana hamerenana ny angovo sy ny rano amin' ny vatana ny ranom-boankazo vaovao azo avy amin' ny manga.

Manampy ny taovam-pandevonan-kanina

Manamora ny fiasan' ny tsinay ny manga masaka noho ny tsiraka mety levona sy ny anzima voajanahary izay manampy amin' ny fandravana ny sakafo. Ampiasaina ny manga mba hitsaboana ny fitohanana malefaka sy handrisika ny fahazotoan-komana ary hanatsarana ny fandevonan-kanina. Izy io koa dia afaka manampy amin' ny fampitoniana ny famaivay sasany amin' ny vavony sy ny hodimandom-pandevonan-kanina. Manana toetra mampifintina ny hodimando ny manga manta, izay makirana kokoa sy be taninina. Raha hanina miaraka amin' ny sira na avy hohamainina izy io dia ampiasaina amin' ny fitsaboana ny piriritra tsotra sy ny fikorontanana sasany mahazo ny tsinay. Potehina ho lasa vovoka ny vihim-boan' ny manga, rehefa maina, mba hitsaboana ny piriritra mitaiza sy ny valan-dra, ary ny katsentsitra an-tsinay sasany. Malaza any amin' ny faritra trôpikaly maromaro ny fananany toetra mamono kankana.

Antiôksida sy manampy ny hery fiarovana

Manampy amin' ny fiarovana ny sela amin' ny fahanterana aloha loatra ny vitaminina sy ny pôlifenôla ary indrindra ny mangiferina. Mandray anjara amin' ny fanohanana ny hery fiarovana koa ny manga. Mandrisika ny famokarana sela fotsy sy manampy ny vatana hahatohitra areti-mihanaka ny fananany vitaminina C betsaka.

Manohana ny fahasalaman' ny fo sy ny lalan-dra

Manampy amin' ny fandrindrana ny tosidra ny pôtasiôma sy maneziôma ao amin' ny manga, fa ny tsiraka azo levona kosa dia manampy amin' ny fampidinana ny kôlesterôla ratsy sy ny trigliserida. Toa manampy amin' ny fampihenana ny fivontosan' ny lalan-dra sy ny tsindrin' ôksida mifandray amin' ny aretim-po aman-dalandra sy ny diabeta karazany faha-2 ny pôlifenôla sy mangiferinina.

Manohana ny fahasalaman' ny maso sy ny hoditra

Noho ny habetsahan' ny beta-karôtena sy ny loteinina ary ny zeaksantinina ao aminy dia fantatra fa mahasoa ny maso ny manga. Manampy amin' ny fiarovana ny temimaso sy misoroka ny fahasimbana sasany mifandraika amin' ny fihanterana na amin' ny fiaretana hazavana ireo fandoko voajanahary ireo. Manampy amin' ny fitazonana ny hoditra sy ny hodimando salama koa ny vitaminina A.

Mitsabo aretina maro hafa

Manohitra ny famaivay sy misoroka ny aretina mitaiza sy mamaivay sasany ny vitaminina sy ny pôlifenôla ary ny mangiferina. Amin' ny fitsaboana nentim-paharazana maro dia heverina ho mpanatanjaka amin' ny ankapobeny izy io ka ilaina hanoherana ny havizanana ara-batana sy ara-tsaina (rafi-pitatitra). Ampiasaina mba hanamaivanana ny aretina maivana mpahazo ny taovam-pisefoana madinika sy ny sita ny fanafody sasany vita amin' ny nofo-manga sy tantely. Ampiasaina amin' ny endrika feta apetaka ny nofom-bihin' ny manga dia hampitony ny fahamaizana madinika na hanakana ny fandehanan-dra kely noho ny fananany toetra misakana fahaverezan-dra. Ampiasaina koa ny nofom-bihin' ny manga mba hanamboarana dobera zavamaniry hikarakarana ny hoditra maina sy ny volo.

Fitandremana

Na dia eo aza ny toetrany maro momba ny fitsaboana sy ny fahasalamana dia tokony hohanina amin' ny antonony ny manga. Somary be siramamy voajanahary ny manga tena masaka, ka mitaky fitandremana ho an' ny olona voan' ny diabeta. Misy akora mampamaivay ary mety hiteraka tohina (tsy fahazakana) na aretin-koditra amin' ny olona sarotiny amin' izany ny hodi-manga sy ny ranom-boany. Farany, mety hiteraka piriritra sy fanaintainan' ny fandevonan-kanina ary fivozihi-kibo ny fihinanana manga be loatra.

Jereo koa

Lisitry ny hazo fihinam-boa eto Madagasikara

Manga (zavamaniry)

Paoma
Paiso