Fiangonana zandriny

Ny fiangonana zandriny, eto Madagasikara, na sekta dia ny fiangonana kristiana niforona na tonga teto Madagasikara taorian' ny fiangonana tranainy. Io teny io dia manondro indrindra ny fiangonana evanjelika, pentekôtista na ny hetsika ara-pivavahana niorina vao haingana izay nivelatra tsy miankina amin' ny antokom-pivavahana lehibe efa niorina taloha. Eto Madagasikara ihany no mampiasa io andian-teny hoe "fiangonana zandriny" io ary tsy tena mazava tsara ny famaritana mety homen' ny olona azy. Ny lahatsoratra an-gazety nany fampahalalam-baovao amin' ny haino aman-jery no matetika ahitana ny fitenenana momba ny fiangonana zandriny. Ny mpitondra fivavahana sy ny mpitondra fanjakana koa dia mampiasa azy io. Na dia nataon' ny Fiangonana lehibe ara-tantara an-jorom-bala aza, dia misy amin’ ny fiangonana zandriny no nandray fepetra mba hiditra amin' ny hetsika ekiomenika. Ny fiangonana zandriny dia mitana anjara toerana lehibe eo amin' ny fiainana ara-tsôsialy sy ara-pôlitika eto Madagasikara.

Ny fampiasana ny hoe "fiangonana zandriny"

Famaritana ara-potoana

Ny fiangonana zandriny dia ny fiangonana kristiana niforona na tonga teto Madagasikara taorian' ny fiangonana tranainy. Ny fiangonana zandriny dia matetika no naorin' ny pasitera mahaleo tena na vondron' ny mpino entanin' ny fanakarana manokana ny Baiboly na fanambaràna ara-paminaniana.

Ireo fiangonana lazaina hoe "zandriny" ireo dia matetika tsy anisan' ny lazaina na milaza tena hoe "fiangonan-dehibe" na "fiangonana ara-tantara", na "fiangonana mitana ny mahazatra" na "fiangonana zokiny" toy ny Fiangonana Loterana Malagasy, ny Eglizy Katôlika Apôstôlika Rômanina, ny Fiangonan' i Jesoa Kristy eto Madagasikara, ny Eklesia Episkopaly Malagasy, ny Fiangonana Ôrtôdôksa, ohatra.

Noho izany dia voafaoka ao anatin' izany ny fiaraha-mivavaka mahaleo tena sy ny fiangonana fifohazana ary ny hetsika prôtestanta vao haingana izay manasongadina ny fanao toy ny fahagagana, ny faminaniana, na ny fanasitranana ara-panahy. Maro anefa ny fiangonana tsy manaiky ny hosokajina hoe "zandriny".

Famaritana ara-tanjaka

Io teny io dia azo ilazana fiangonana kely ihany koa, matetika manana mpikambana vitsy, na loharanon-karena kely, ka tsy tena fantatry ny fanjakana na ny fiarahamonina. Amin' io heviny io, ny hoe "zandriny" dia manondro ny hakelin' ilay fiangonana.

Karazana fiangonana zandriny

Mason-tsivana ara-potoana

Fiangonana niala avy amin' ny fiangonana efa nisy

Ny sasany amin' ny fiangonana lazaina hoe "zandriny" dia teraka noho ny fialàny avy amin' ny fiangonana tranainy (matetika fiangonana prôtestanta) na avy amin' ny fikambanana kristiana nisy teo aloha (noho ny tsy fitoviam-pomba fahazoana ny Baiboly na ny antony hafa). Ny fisarahana dia mety ho nitranga teto Madagasikara na tany ivelany.

Fiangonana vaovao tanteraka

Maro koa ny fiangonana izay tsy nipoitra avy tamin' ny fiangonana tranainy kokoa. Matetika ny fiangonana efa niorina taloha ela no miantso ireo fiangonana ireo hoe "sekta". Ny fiorenany dia mety teto Madagasikara na tany ivelany.

Tsy voatery ho sekta

Fiangonana zandriny ampangaina ho sekta

Matetika ny fiangonana nialana no tsy mihambahamba miantso ny fiangonana niala avy ao aminy hoe "sekta" noho ny tsy fanomezan-danjan' ireto vaovao ireto ny firaisana (firaisana sinôda, firaisana fampianarana na firaisana fanao). Indraindray dia ampangaina ho "sekta" koa ny fiangonana niforona tsy avy amin' ny fisarahana satria heverina ho tsy misy fitohizana ara-tantara amin' ny fiangonana tranainy.

Indraindray koa anefa dia enti-manalefaka na manatsaratsara fitenenana ny hoe "fiangonana zandriny", mba tsy hampiasana ny hoe "sekta", nefa tsy mitovy ny zavatra tondroina amin' ireo teny roa ireo satria misy ny fiangonana lazaina hoe "sekta" izay efa nisy ela talohan' ny fiangonana heverina ho "tsy sekta".

Fanomezana lanja

Ny andian-teny hoe "fiangonana zandriny" dia enti-maneho fanomezan-danja ny fiangonana niforona taoriana kokoa izay tsy sokajina ho "sekta" satria azo lazaina fa manao fampianarana marina (ôrtôdôksia).

Ny anjara toeran' ny fiangonana zandriny

Ny fiangonana zandriny sy ny ekiomenisma

Fandraisana anjara amin' ny hetsika ekiomenika

Misy amin' ny fiangonana zandriny no naneho ny faniriany hampandroso ny firaisan' ny maha-Kristianina, ka namerina ny vavaka nataon' i Jesoa ho an' ny firaisan' ny Fiangonana (Joany 17:21). Nanangana sehatra ho fitaizana sy fitazonana izany hevitra momba ny firaisana sy ny fiombonana izany izy ireo, hitondra anjara biriky amin' ny fiainana ekiomenikan' ny Fiangonana eto Madagasikara. Ny hetsika toa ny Fiombonan' ny Fiangonana Zandriny (FIFIZA) dia maneho izany faniriana fiaraha-miasa izany. Ny FIFIIZA dia mampivondrona fiangonana evanjelika mahaleo tena maromaro, mikatsaka ny hampiray ny ezaka ataony hanamafisana ny fiantraikany ara-panahy sy ara-tsôsialy.

Sakana amin' ny fidirana

Ny fampidirana ny fiangonana zandriny ao anatin’i ny rafitra ekiomenika efa naorina, toy ny Fiombonan' ny Fiangonana Kristianina eto Madagasikara (FFKM), dia voafetra ihany. Ny FFKM. Antony maromaro no mahatonga an' io fanilihana io: Betsaka ny fiangonana zandriny no tsy manana sata ôfisialy amin' ny maha fiangonana azy, izay manasarotra ny fandraisany anjara amin' ny fifanakalozan-kevitra ekiomenika. Ny sasany amin' ireo fiangonana ireo dia manaraka fomba fanao litorzika sy fampianarana heverin' ny fiangonana nentim-paharazana ho tsy mifanaraka amin' ny ôrtôdôksia, ka mahatonga ny tsy fahatokisana sy ny fisalasalana amin' ny fampitambarana.

Ny fiangonana zandriny sy ny fiarahamonina malagasy

Firaisankina sy fanohanana ny fiarahamonina

Ny fiangonana zandriny dia miankina amin' ny soatoavina ara-kolontsaina malagasy toy ny fihavanana mba hanamafisana ny firaisankina eo anivon' ny fiarahamonina. Izy ireo dia mikarakara hetsika ara-tsôsialy toy ny fifanampiana sy ny fanohanana ny olona marefo ary ny fanelanelanana amin' ny fifanoherana, ka manampy amin' ny fitoniana ara-tsôsialy, indrindra any ambanivohitra. Ity fomba fiasa ity dia anisan' ny fomban' ny fokonolona, ​​izay rafi-piarahamonina fototra mampiroborobo ny fandraisana anjara sy ny fitantanana eny ifotony.

Fandraisana anjara ara-pôlitika sy fanilikilihana

Eo amin' ny lafiny pôlitika, ny fiangonana zandriny dia manana fahefana voafetra raha oharina amin’ ny fiangonana lehibe mpikambana ao amin' ny FFKM. Na izany aza, indraindray izy ireo dia mandray anjara amin' ny hetsika ara-tsôsialy na ara-pôlitika, indrindra amin' ny fotoan-tsarotra, amin' ny fanetsiketsehana ny mpanara-dia azy amin' ny soatoavina ara-panahy sy ara-môraly.

Jereo koa

• Sekta
• Adventisma
• Evanjelisma

• Pentekôtisma
• Fiangonana zokiny
• Evanjelisma eto Madagasikara
• Loteranisma eto Madagasikara
• Katôlisisma eto Madagasikara
• Prôtestantisma eto Madagasikara

Rohy ivelany

• "Androm-bavaka maneran-tany eto Madagasikara Hifanakalo polipitra ny fiangonana zokiny sy zandriny", www.tiatanindrazana.mg
• "Nouvelle-Evangelisation", fr.scribd.com