Tsangambato (kolontsaina malagasy)
Ny tsangambato, eo amin' ny kolontsaina malagasy, dia vato lehibe sy lava alevina mijoro ny ampahany kely, izay atao ho fahatsiarovana zava-nitranga na olona maty. Ny olona maty any an-toeran-kafa ka tsy hita taolambalo no anaovana tsangambato, ary ilay olona maty dia mety ho mpiantafika maty an' ady na sokajin' olona hafa. Raha vato voajanahary no nanaovana tsangambato taloha, ankehitriny kosa dia ampiasaina koa ny simenitra sy ny fasika mba hanamboarana tsangambato.
Eo amin' ny kolontsaina nentim-paharazana
[hanova | hanova ny fango]Ny tsangambato dia singa iray eo amin' ny kolontsaina malagasy, izay manana ny lanjany ara-tantara ara-tandindona, izay natao ho fahatsiarovana ny razambe, na ny mpiady maty an' ady lavitra ny tanindrazany ka tsy azo hita faty na tsy azo nentina an-tanidrazana ny fatiny. Ny tsangambato, noho izany, dia marika anehoan' ny Malagasy ny fanajana lalina ny razambeny sy ny razana.
Fampiasana ny tsangambato
[hanova | hanova ny fango]Natao hanomezam-boninahitra sy hamelona ny fahatsiarovana azy ireo maharitra eo amin' ny fiarahamonina ny tsangambato izay miantoka ny fifandraisan' ny tontolon' ny velona sy ny tontolon' ireo izay efa niamboho. Fitaovana amaritana ny tanin' ny razana sy famantarana ny maha mpikambana ao amin' ny foko na zana-poko iray koa indraindray manokana ny fisian' ny tsangambato eo an-tanàna na ny faritra misy ny fiarahamonina iray.
Endriky ny tsangambato
[hanova | hanova ny fango]Mety hanana endrika isan-karazany ny tsangambato, fa amin' ny ankapobeny dia lava sady mampahatsiahy ny fitsanganan' ny olona izany. Indraindray izy io dia manana endrika voajanahary nefa matetika dia sokitra avy amin' ny vatolampy eo an-toerana, matetika vatorano (granita) na bazalta. Indraidray koa ny tsangambato dia voaravaka amin' ny endrika jeômetrika na sari-javatra hafa misy heviny manokana izay sokirina eny aminy.
Fombafomba atao mandritra ny fanorenena tsangambato
[hanova | hanova ny fango]Anaovana lanonana nentim-paharazana manokana ny fananganana tsangambato, izay fotoana ivondronan' ny mpiara-monina na ny fianakaviana, mba hanamafisana ny fifandraisana sy hampitana ny soatoavina amin' ny taranaka. Zava-dehibe eo amin' ny kolontsaina nentim-paharazana malagasy ny tsangambato ary mbola hajaina ankehitriny. Misy ny fombafomba toy ny fanomonoana omby sy ny fanidinana sy fisotroana toaka. Zavatra maro no atao mba hitahirizana sy hanomezan-danja ny tsangambatom-pahatsiarovana ny maty, mba hamelomana mandrakariva ny fahatsiarovana ny razana sy hampita naizany izany lova sarobidy izany amin' ny taranaka.
Tsangambato môderna
[hanova | hanova ny fango]
Ankehitriny dia betsaka ny Malagasy manamboatra tsangambato amin' ny simenitra sy ny fasika. Amin' izany dia mety miova ny fombafomba sy ny antony ananganana tsangambato.