Randriamamonjy Frédéric

Avy amin'i Wikipedia

Randriamamonjy Frédéric dia mpanoratra, mpahay tantara, mpikambana ao amin' ny Akademia malagasy, ary efa nanao ny asan' ny masoivohon' i Madagasikara tany amin' ny firenena maro. Teraka tao Ampananganana, Mandialaza, tamin' ny 25 mey 1932 izy. Randriamaro, mpitandrina sy Ramavo no ray aman-dreniny. I Esther Rasoloarimalala, izay mpanoratra koa, no vadiny.

Ny fianarany[hanova | hanova ny fango]

Teto Madagasikara[hanova | hanova ny fango]

Tao amin' ny sekolim-panjakana tao Mandialaza izy no nanomboka nianatra. Nanohy ny fianarany tao amin' ny sekoly prôtestanta Ambatonakanga, Ambatomanga, Rasalama, Paul Minault izy. Nahazo ny mari-pahaizana Certificat d’Aptitude à l’Enseignements dans les Écoles du Premier Degré (CAE) tao amin' ny École Normale d’Ambatomanga tamin' ny taona 1949.

Tany ivelany[hanova | hanova ny fango]

Nanohy fianarana tany ampitan-dranomasina izy ka ireto ny mari-pahaizana azony:

  • Baccalauréat Sciences Expérimentales tao amin' ny Collège Cévenol any Le Chambon sur Lignon any Frantsa tamin' ny taona 1954;
  • Licence ès Sciences Naturelles tany Montpellier any Frantsa tamin' ny taona 1957;
  • Doctorat de 3e Cycle en Entomologie tany Dijon any Frantsa tamin' ny taona 1963;
  • Master of Science in Ecology tany Durham any amin' ny Fanjakana Mitambatra tamin' ny taona 1967;
  • Certificate on Field Biology tany amin' ny Université any Rhode Island any Etazonia tamin' ny taona 1967.

Ny fianakaviany[hanova | hanova ny fango]

Teraka tao Ampananganana, Mandialaza, tamin' ny 25 mey 1932 izy. Randriamaro, mpitandrina sy Ramavo no ray aman-dreniny. Nanambady an-Rasoloarimalala Esther, izay mpampianatra literatiora (mpikambana ao amin' ny Akademia Malagasy sy ao amin' ny Union des Poètes et Écrivains Malgaches - UPEM), izy tamin' ny taona 1960. Manan-janaka efatra izy mivady.

Ny adidy sy ny asa aman-draharahany[hanova | hanova ny fango]

Fampianarana[hanova | hanova ny fango]

Nampianatra tao amin' ny Sekoly Prôtestanta ao Ambatonakanga izy teo anelanelan' ny taona 1958 sy 1961, sy tao amin' ny Kolejy Paul Minault koa teo anelanelan' ny taona 1963 sy 1966, ary tao amin' ny Institut National Supérieur de Formation et de Recherche Pédagogiques tao Antananarivo teo anelanelan' ny taona 1967 sy 1970. Nampianatra tao amin' ny École Normale Supérieure d'Antananarivo izy teo anelanelan' ny taona 1987 sy 1992. Mpikambana ao amin' ny Akademiam-pirenena Malagasy izy. Nisahana ny asan' ny Président de la Section des Sciences Morales et Politiques de l’Académie Malgache tamin' ny taona 2005.

Andraikitra teo amin' ny fiangonana[hanova | hanova ny fango]

Diakona tao amin' ny FJKM Tranovato Ambatonakanga izy hatramin' ny 1966 ary loholona tato aoriana. Tamin' ny 1970 izy dia voatendry ho "Tonia miandraikitra ny fifandraisana amin' ny Fiangonana any Afrika" (Secrétaire pour l’Afrique au Conseil Œcuménique des Églises) tao amin' ny Conseil Œcuménique des Églises tao Genève (any Soisa), ka niasa teo anelanelan' ny taona 1970 sy 1975.

Andraikitra ara-pôlitika[hanova | hanova ny fango]

Ambasadaoron' i Madagasikara tany amin' ny firenena kômonista (Firaisana Sôvietika, Repoblika Demôkratika Alemàna, Hôngria, Tsekôslôvakia, tany Pôlônia, tany Bolgaria) izy, nefa nipetraka tao Môskoa, teo anelanelan' ny taona 1975 sy 1986. Tamin' izany no nahazoany ny mari-pankasitrahana Ordre de l' Amitié des Peuples (Firaisana Sôvietika). Mpanolotsainan' ny tanànan' Antananarivo izy tamin'ny taona 1969. Mpikambana tao amin' ny Haute Autorité de l'État teo anelanelan' ny taona 1992 sy 1993, nandritra ny fitondrana tetezamita, izy. Solombavambahoaka izy tamin' ny taona 1993 hatramin' ny 1998.

Ny asa sorany[hanova | hanova ny fango]

Maro ny boky nosoratany, ka ireto ny ampahany amin' izany:

  • Contribution à la connaissance de Deborrea malagassa Heyl, Psychidae (1961).
  • Étude du squelette et de la musculature céphaliques de Phthorimaea heliopa Low, Pschyade, Thèse de 3e Cycle, 1963.
  • Les plantes à tubercules. Fiche pédagogique Audecam, UNESCO, 1968.
  • Studies on the overwintering of mosquitoes at Durham, 1967.
  • Anaran' ny Biby sy ny zavamaniry fahita andavanandro. Manuel d'indentification pratique d'espèces animales et végétales courantes, niarahany nanoratra tamin-Rasoloarimalala Esther, 1977.
  • Tantaran' i Madagasikara isam-paritra , Trano Printy Fiangonana Loterana Malagasy, Antananarivo, 2001.
  • Tantaran' i Madagasikara 1895 – 2002, Trano Printy Fiangonana Loterana Malagasy, 2006.
  • Histoire des régions de Madagascar dès origines à la fin du 19ème siècle, Trano Printy Fiangonana Loterana Malagasy.

Rohy ivelany[hanova | hanova ny fango]

Jereo koa[hanova | hanova ny fango]