Fahalavoan' ny Olombelona
Ny fahalavoan' ny olombelona, ny fahalavoan' i Adama, na ny Fahalavoana tsotra izao, dia teny ampiasaina ao amin' ny fivavahana kristiana mba hilazana ny fiovan' ny lehilahy sy ny vehivavy voalohany avy amin' ny fankatoavana an' Andriamanitra ho amin' ny toetry ny tsy fankatoavana.
Avy amin' ny fandikana ara-Baiboly ny Genesisy, toko 1-3, ny fotopampianaran' ny Fahalavoana. Tamin' ny voalohany dia niara-nipetraka tamin' Andriamanitra tao amin' ny saha Edena i Adama sy i Eva, saingy naka fanahy azy ireo ny menarana mba hihinana ny voan' ny hazo fahalalana ny tsara sy ny ratsy, izay efa nandraran' Andriamanitra. Rehefa avy nanao izany izy ireo dia nanjary menatra noho ny fitanjahany ary noroahin' Andriamanitra hiala avy ao amin' ny saha izy ireo mba hisakanana azy tsy hihinana ny voan' ny hazon' aina ka ho lasa tsy mety maty.
Ao amin' ny kristianisma mahazatra (nikeana), ny fotopampianaran' ny Fahalavoana dia mifandray akaiky amin' ny fahotana tany am-boalohany (fahotana tamin' ny fototra) na ny fahotan' ny razana. Mino izy ireo fa ny Fahalavoana dia nitondra ota teto amin' izao tontolo izao, nanimba ny tontolo voajanahary iray manontolo, anisan' izany ny maha olombelona, ka nahatonga ny olombelona rehetra ho teraka tao amin' ny ota tany am-boalohany, izay toe-javatra izay tsy ahafahany mahazo ny fiainana mandrakizay raha tsy misy ny fahasoavan' Andriamanitra. Manaiky ny foto-kevitry ny Fahalavoana ny Eglizy Ôrtôdôksa Tatsinanana saingy mandà ny fiheverana fa nifindra amin' ny taranaka fara aman-dimby ny heloka noho ny ota tany am-boalohany, izay aorina amin' ny ampahany amin' ny andalana ao amin' ny Ezekiela 18:20 izay milaza fa tsy meloka amin' ny fahotan' ny rainy ny zanakalahy. Mino ny Prôtestanta kalvinista fa nanolotra ny ainy ho sorona ho an' ny olom-boafidy i Jesoa, mba hanavotana azy ireo amin' ny fahotany.
Nozarain' ny Kalvinista sasany ho sopralapsariana (prelapsariana na antelapsariana, "talohan' ny Fahalavoana") sy infralapsariana (soblapsarian na pôstlapsariana, "taorian' ny Fahalavoana") ny lapsarianisma, izay fahatakarana ny filaharan' ny didin' Andriamanitra mifandraika amin' ny Fahalavoana.
Ny fitantarana ny Saha Edena sy ny fahalavoan' ny olombelona dia lovam-pampianarana itovian' ny fivavahana abrahamika rehetra, miaraka amin' ny fanehoana an' ohatra ny fitondran-tena sy ny finoana ara-pivavahana jodeô-kristiana, izay nisy fiantraikany goavana teo amin' ny fiheverana momba ny firaisana ara-nofo, ny andraikitry ny lahy sy ny vavy ary ny fahasamihafan' ny lahy sy ny vavy eo amin' ny sivilizasiôna tandrefana sy sivilizasiôna silamo. Tsy toy ny kristianisma ny fivavahana abrahamika lehibe hafa, ny jodaisma sy ny silamo, izay tsy manana fampianarana momba ny "fahotana tamin' ny fototra", fa kosa namolavola fandikana hafa samihafa momba ny fitantarana an' i Edena.