Bokin' i Mikà

Avy amin'i Wikipedia
(tonga teto avy amin'ny Bokin'i Mika)
Ny Mpaminany Mikà, nataon' i James Tissot, tanelanelan' ny taona 1896 sy 1902.

Ny Bokin' i Mikà na Bokin' i Mika na Bokin' i Mikea dia boky ao amin' ny Tanakh (Baiboly hebreo) sy ao amin' ny Testamenta Taloha ao amin' ny Baiboly kristiana. Isan' ireo atao hoe Mpaminany madinika roa ambin' ny folo izay zana-tsokajin' ny Bokin' ny mpaminany ao amin' ny Baiboly kristiana sy isan' ireo ao amin' ny Nevi'im ao amin' ny Tanakh. Natao hamerina ny fandriam-pahalemana sy ny fahamarinana ara-tsôsialy ny mpaminany Mikà na Mika na Mikea. Ity boky ity dia mirakitra faminaniana natokana ho an' i Samaria renivohitry ny Fanjakan' i Israely ary ho an' i Jerosalema renivohitry ny Fanjakan' i Jodà, satria tsy nitondra ny fireneny hanompo an' Andriamanitra ny mpitondra tao fa nanompo andriamani-kafa sady nifetsy sy nangalatra ny fananan' ny malahelo. Hovalian' Andriamanitra noho izany i Israely sy i Jodà. Nefa nampanantena Andriamanitra fa amin' ny andro ho avy, ny vahoakan' i Israely sy ny an' i Jodà dia hiverina amin' Andriamanitra ary ny mpanjaka hotendreny dia hanao izay hampiadana ny vahoaka sahala amin' ny mpiandry ondry izay mikarakara ny ondriny sady hitondra fiadanana amin' ny tany rehetra.

Ny fonoratana ny boky[hanova | hanova ny fango]

Tany amin' ny tanàna ambanivohitra atao hoe Moreseta ao atsimon' ny Fanjakan' i Jodà no nonenan' i Mikà (na Mika na Mikea). Tamin' ny andron' ny mpanjaka Jotama sy Ahaza (na Akaza) ary Hezekia (na Ezekiasa) no fotoana niainany, izany hoe taloha sy taorian' ny nahazoan' i Asiria an' i Samaria renivohitry ny Fanjakan' i Israely. Niaina tamin' ny fotoana mitovitovy amin' ny an' ny mpaminany Hôsea (na Ôsea) sy ny mpaminany Isaia (na Izaia) izy. Tsy tiany ny fombam-pianinana an-drenivohitra izay ahitana izao karazam-pahotana maro rehetra izao.

Misy amin' ny mpikaroka ny mihevitra fa i Mikà irery ihany no nanoratra ny Bokin' i Mikà. Ny toko voalohany hatramin' ny faha-3 no heverin' ny mpandinika sasany ho tena nosoratan' ilay mpaminany. Misy andalana maro izay toa voasoratra nandritra na taorian' ny Fahababoana, dia ny toko faha-4 sy faha-5; ary taorian' io fotoana io, dia ny Mik. 2.12-13, ny Mik.4.6-7, ny Mik. 5.6-7 ary ny Mik. 7.8-20.

Anaran' ny boky[hanova | hanova ny fango]

Amin' ny teny hebreo dia atao hoe ספר מִיכָה / Sefer Mîkhāh ny Bokin' i Mikà. Ao amin' ny Septoajinta amin' ny teny grika izy dia atao hoe Μιχαίας Γʹ / III Mikhaías (ny litera gama Γʹ dia manambara ny maha mpaminany madinika laharana fahatelo azy).

Fizaràn' ny boky[hanova | hanova ny fango]

Azo zaraina efatra ny Bokin' i Mika :

Ny hitsarana an' i Isiraely (1.1 – 3.12)[hanova | hanova ny fango]

  • Teny fanehoana ny mpaminany Mikà (1.1)
  • Ny loza hanjo an' i Samaria sy an'i Jodà (1.2 – 1.16)
  • Ny helok' i Israely sy ny fahoriana hahazo azy ary ny hamerenan' Andriamanitra azy indray (2.1 – 2.13)
  • Ny fahadisoan' ny mpitondra an' i Isiraely sy ny handravana an' i Jerosalema (3.1 – 3.12)

Ny fampanantenana ho an' i Ziôna (4.1 – 5.14)[hanova | hanova ny fango]

  • Ny hamerenana an' i Ziôna (na Siôna) amin' ny voninahiny ary ny fampaherezana azy (4.1 – 4.14)
  • Ny hahaterahan' ny Mpifehy avy amin' Andriamanitra sy ny fiadanan' ny fanjakany (5.1 – 5.14)

Ny hitsarana an' i Israely (6.1 – 7.7)[hanova | hanova ny fango]

  • Teny fampibebahana an' i Israely (6.1 – 6.16)
  • Ny faharatsian' i Israely sy ny hanjo azy (7.1 – 7.7)

Ny hiverenan' ny voninahitr' i Ziôna (7.8 – 7.20)[hanova | hanova ny fango]

  • Tsy very fanantenana i Ziôna (7.8 – 7.13)
  • Ny vavak' i Mikà (7.14 – 7.20)

Jereo koa[hanova | hanova ny fango]