Roland Ratsiraka
I Roland Ratsiraka dia mpanao pôlitika malagasy teraka tamin' ny 15 Aogositra 1966 tao Antananarivo. Iarovana Roland Ratsiraka no anarany feno.
Nianatra tany Frantsa sy teto Madagasikara izy talohan' ny nananganany orinasa maromaro. Tamin' ny taona 1996 no notendren' ny filoha teo aloha Didier Ratsiraka, dadatoany, ho mpitantana ny fampielezan-kevitra tao amin' ny faritanin' i Toamasina izy. Tamin' ny taona 1998 izy no nanangana ny antoko pôlitika Toamasina Tonga Saina (TTS), ary voafidy ho solombavambahoaka avy ao amin' ny boriborintany voalohany ao Toamasina. Tamin' ny taona 1999 izy no voafidy ho ben' ny tanànan' i Toamasina, saingy naato tamin' ny asany tamin' ny taona 2002. Voafidy ho ben' ny tanàna indray izy tamin' ny taona 2003.
Tamin' ny 2006 dia nifaninana tamin' ny fifidianana filohan' ny Repoblika izy ary nahazo ny laharana faha-3 tamin' ny vato 10 %. Taorian' ny fampiatoana azy tamin' ny Febroary 2007 dia nosamborina sy nigadra noho ny fiampangana kolikoly izy. Nanohitra izany fanapahan-kevitra izany tao Toamasina ny mpomba azy, saingy taorian' ny fihetsiketsehana izay nivadika ho fandrobana dia nosakanana tsy hanao izany izy ireo. Tamin' ny 5 Ôktôbra 2007 dia voaheloka higadra 18 volana i Roland Ratsiraka nefa navotsotra tamin' io andro io ihany izy.
Tamin' ny taona 2009 dia niaraka tamin' i Andry Rajoelina izy nandritra ny krizy pôlitika 2009. Nirotsaka hofidiana ho filoham-pirenena izy tamin' ny taona 2013, ka nahazo ny laharana faha-4 tamin' ny vato 9 %. Taorian' izay dia nitana ny toeran' ny minisitry ny Asa Vaventy izy tamin' ny taona 2014 ka hatramin' ny 2016, avy eo ny minisitry ny Fizahantany tamin' ny taona 2016 ka hatramin' ny 2018. Kandidà tamin' ny fifidianana filoham-pirenena 2018 izy, nefa raraka tamin' ny fihodinana voalohany, izay tsy nahazoany afa-tsy 0,43 % amin' ny vato. Nanapa-kevitra ny hanohana an' i Andry Rajoelina amin' ny fihodinana faharoa izy avy eo.
Rehefa lany soa aman-tsara i Andry Rajoelina dia anisan' ireo mpitsikera ny fitondrany i Roland Ratsiraka izay slombavambahoaka ihany koa.