Paradisa (silamo)
Ny Paradisa na Jannah, araka ny finoana silamo, no fonenan' ny olo-marina. Araka ny fanisana iray dia miseho in-147 ao amin’ ny Kor'any io teny hoe "Jannah" io. Ny finoana ny any ankoatra dia iray amin' ny fanekem-pinoana enina ao amin' ny sonisma sy siisman' ny roa ambin' ny folo, izay toerana hifalian' ny "mino" (Mumin), fa ny tsy mino (Kafir) kosa hijaly ao amin' ny Jahannam (izany hoe ao amin' ny helo). Atao amin' ny teny arabo hoe جَنّة / janna, na جَنّٰت / jannat (raha maro) ("paradisa", "zaridaina") ny Paradisa.
Ao amin' ny Kor'any, ny hevitry ny hoe "paradisa" dia afaka mampifoha ao an-tsaina ny paradisa tany am-boalohany izay nipetrahan' i Adama, amin' ny fiheverana tena akaiky ny Bokin' ny Genesisy, sy ireo zaridaina izay halehan' ny mpino aorian' ny fahafatesany. Io fiheverana io dia tsy mitovy amin’ ny fiheverana araka ny Baiboly momba ny Paradisa. Tsy hita ao amin' ny jodaisma sy ny kristianisma mantsy ny famaritana mazava tsara toy izany momba ny "jeôgrafian' ny lanitra". Io no "manorina ny fiavahana fototra ao amin' ny eskatôlôjia mozilmana".
Ny Paradisa (Jannah) sy ny Helo (Jahannam) dia inoana fa misy ambaratonga maromaro: momba ny Jannah, arakaraka ny haavon' ny ambaratonga no misy ny zavatra tiana kokoa, fa momba ny Jahannam kosa, ny haavon' ny ambaratonga no mahamafy ny sazy omena. Ao amin' ny Jannah no avo indrindra ny laza sy ny fahafinaretana, ao amin' ny Jahannam ny hamafin' ny fahoriana. Ny traikefa any ankoatra dia voalaza fa ara-batana sy ara-tsaina ary ara-panahy. Ny Jannah dia lazaina fa misy zava-mahafinaritra ara-batana toy ny zaridaina, ny vehivavy virjiny tsara tarehy (houri), ny divay tsy misy vokany aorian' ny fisotroana azy, ary fahafinaretana araka an' Andriamanitra. Miovaova arakaraka ny fahamarinan' ilay olona ny valisoa fahafinaretana azony. Matetika ny toetran’ ny Jannah no mifanitsy amin' ny an' ny Jahannam. Ny fahafinaretana ao amin' ny Jannah voalaza ao amin' ny Kor'any dia mifanandrify amin' ny fanaintainana sy ny horohoro ao amin' ny Jahannam.
Antsoina hoe fonenan’ i Adama sy Eva talohan' ny nandroahana azy ireo koa ny Jannah. Ny ankamaroan' ny Mozilmana dia mihevitra fa ny Jannah (toy izany koa ny Jahannam) dia miaraka amin' ny tontolo ara-nofo, fa tsy hoforonina aorian' ny Andro Fitsarana. Na dia mety tsy handingana ny sisin-tany mankany amin' ny tontolo any ankoatra aza ny olombelona, ny any ankoatra dia mety hisy fiantraikany amin' ny tontolon' ny olombelona.