Korian-dranomasina

Ny korian-dranomasina lehibe (miloko mena ny koriana mafana, manga ny koriana mangatsiaka) izay mampita hafanana manerana ny ila-bolantany tsirairay, avaratra sy atsimo misaraka.

Ny korian-dranomasina na rian-dranomasina dia hetsika marindranon' ny rano an-dranomasina sy an-dranomasimbe izay mandeha lavitra dia lavitra (arivo kilômetatra maromaro), ety ivelany na any amin' ny halalin' ny ranomasina sy ny ranomasimbe, noho ny fiantraikan' ny rivotra sy ny herin' i Coriolis, ny fahasamihafan' ny maripana, ny hakitroka, ary ny fasira; mandray anjara amin' izany koa ny endrika mikovilavilan' ny kôntinenta sy ny fikitoantoan' ny fanambanin' ny ranomasina. Ny korian-dranomasina dia manana ny zotrany, ny hafainganam-pandehany, ny habetsahan' ny fikorianany ary ny maripanany.

Ny korian-dranomasina rehetra ety ivelany sy any ambanin' ny ranomasina dia endrika misangodingodina sy mivezivezy izay miteraka tsingerina lehibe manetsiketsika ny rano sy mitondra hafanana amin' ny ila-bolantany tsirairay. Miantraika amin' ny maripanan' ny faritra andalovany ny korian-dranomsina, ka ankoatra ny hamandoana dia misy fiantraikany lehibe amin' ny toetany ny rian-dranomasina.