Eukaryota

Ny Eukaryota dia sehatra mampivondrona ny zavamananaina rehetra, tokan-tsela na maro sela, izay manana vihy (nucleus) ary amin' ny ankapobeny mananaôrganita na ôrganela miasa manokana amin' ny fisefoana, indrindra ny mitôkôndria ao amin' ny aerôbia sy ny hidrôzenôzôma amin' ny anaerôbia sasany. Amin' ny teny malagasy izy ireo dia atao hoe eokariôta. Ny Eukaryota dia miavaka amin' ny sehatra na fanjakana roa hafa, dia ny Bacteria sy ny Archaea.
Mamondrona ny dimy amin' ny fanjakana fito ao amin' ny tontolon' ny zavamananaina ny Eukaryota:
- ny Animalia (biby),
- ny Plantae (ny zavamaniry manao fôtôsentezy),
- ny Fungi (anisan' ny holatra sasany),
- ny Chromista (krômista),
- ary ny Protozoa (prôtôzôa, tao anatin' ny Protista miaraka amin' ny Protophyta).
Indraindray ny Eukaryota tokan-tsela dia avondrona amin' ny teny hoe "Protista" sy ny tokan-tsela tsy Eukaryota amin' ny anarana hoe "Prokaryota", nefa parafiletika ireo vondrona roa ireo.
Afaka mitimbo taranaka ara-pananahana (amin' ny alalan' ny meiôzy sy fitambaran' ny selam-pananahana na gameta) na tsia (amin' ny alalan' ny mitôzy) ny Eukaryota. Ao amin' ny mitôzy dia mizara ny sela iray mba hamokatra sela roa mitovy ara-pototarazo. Ao amin' ny meiôzy dia arakarahin' ny fizaràn' ny sela misy tsingerina roa ny dika mitovin' ny ADN mba hamokatra zana-tsela haplôida efatra. Miasa toy ny selam-pananahana (gameta) ireo zana-tsela ireo. Tsy manana afa-tsy andian-krômôzôma iray ny gameta tsirairay, ary fifangaroana tokana amin' ny krômôzôman' ny ray aman-dreny vokatry ny fikambanana ara-pototarazo mandritra ny meiôzy ny andiana tsirairay.