Holatra
.jpg)
Ny holatra dia zavamaniry eokariôta maro sela na tokan-tsela. Ny zavamaniry filamatra omena ny anarana hoe "holatra" dia ny holatra fotsy famboly atao hoe, Agaricus bisporus; noho izany, ny teny hoe "holatra" dia matetika ampiasaina hanondroana ny zavamaniry anisan' ny Fungi (Basidiomycota, Agaricomycetes) manana "taho" sy "satroka" ary "sagoaga" (sahala amin' ny fitaovam-pisefoan' ny trondro) eo ambanin' ny satrony. Ny teny hoe "holatra" dia mamariparitra karazana holatra hafa, misy na tsy misy tahony na tongony; noho izany, io teny io dia ampiasaina hilazana ny famoazana misy nofony ao amin' ny Ascomycota sasany. Ny sagoaga dia mamokatra spôra mikrôskôpika izay manampy ny holatra hiparitaka amin' ny tany na eny amin' ny zavatra hafa eo ambonin' ny tany.
Tsy voafaritra mazava tsara ny zavamaniry tondroina amin' ny hoe "holatra" ka heverin' ny siansa ankehitriny ho lany andro satria tsy manondro vondrona mônôfiletika fa taksôna maromaro. Raha ny marina dia nizara ho Eumycota, Oomycota, Chytridiomycota et Mycetozoa. Tsy mihetsika ny selan' izy ireo, izay misy rindrina kitinina na selolôzy, ary mivelona amin' ny alalan' ny fitelemana môlekiola ôrganika mivantana avy amin' ny toerana aniriany. Tsy misy famaitso na plasta ny sela (tokana na maro) satria heterôtrôfa manoloana ny karbônina ireo zavamananaina ireo. Noho izany dia tsy anisan' ny Plantae izy ireo. Ny fitaovam-paniriany dia atao hoe thallus (izay fitambarana sarikofehy antsoina hoe hyphae mamorona ny miseliôma): noho izany dia Thallophyta izy ireo. Ahafahana mamondrona ny zavamananaina ao anatin' ny vondrona samihafa ao amin' ny tantaran' ny fivoarany (filôjenia) ireo toetra ireo, izay mety tsy ho hita ao amin' ny taksôna sasany.
Ao amin' ny vondrona Eumycota ny holatra tena izy rehetra ary mitsinjara amin' ny Basidiomycota, toy ny holatra Amanita (kindreotainomby) na, ho an' ny sasany, amin' ny Ascomycota, toy ny Morchella na ny Tuber magnatum na ny Tuber melanosporum. Vondrona roa no antsoina matetika hoe "holatra" saingy tsy amin' ny heviny hentitr' io teny io: ny Oomycota (manakaiky kokoa ny ahidrano mena) sy ny Myxomycetes.
Ao amin' ny firaketana fôsily nandritra ny 450 tapitrisa taona, izany hoe tamin' ny Vanim-potoana Siloriana, dia nanjanaka saika ny tontolo an-tanety sy an-dranomamy rehetra, eny fa na an-drano masirasira sy an-dranomasina mihitsy aza (karazana 1 500 farafahakeliny, izay manana anjara toerana lehibe eo amin' ny tontolo iainana; amin' ny alalan' ny fiarahany miaina amin' ny ahidrano indraindray.).
Ny holatra Mycorrhiza voalohany ao amin' ny karazana Glomeromycota angamba no nanampy ireo zavamaniry an-tanety voalohany nanjanaka ny tany maina.
Ny antsoina matetika hoe "holatra", raha ny marina, dia ny "famoazana" amin' ny fotoana voafetra sy hita maso, atao hoe spôrôfôra (antsoina hoe "karpôfôra" taloha), avy amin' ny zavamananaina manana toetra mateza kokoa sy miafina kokoa, ny Macromycetes, izay matetika manana rafi-tsarikofehy mitambatra ka mamorona ny miseliôma, amin' ny ankapobeny tsy hitan' ny maso rehefa mitokana irery. Matetika ny spôrôfôra dia miseho amin' ny endrika tongotra misy satroka. Fantatra tsara koa ny endrika hafan' ny spôrôfôra: amin' ny endrika kirihitra kely toy ny Ramariaceae, amin' ny endrika lela eny amin' ny vatan-kazo toy ny Fistulina, amin' ny endrika kaopy toy ny Peziza, amin' ny endrika bola toy ny Calvatia sy Calbovista ary Lycoperdon, sns.
Ny fandalinana ny holatra, mikôlôjia, dia sahanin' ny mikôlôga.