Aller au contenu

Bararata

Avy amin'i Wikipedia
Bararata misy voniny

Ny bararata dia zavamaniry lava hita maniry amin' ny tany mando sy amin' ny toerana be fasika, eny amin' ny honahona, sisin-drano, renirano sns. Atao hoe Phragmites australis ny anarany ara-tsiansa. Misy karazany maromaro ny bararata, izay nivoatra manokana avy nandritra ny an' arivony taona. Nanomboka tamin' ny fiandohan' ny taonjato faha-20 dia nisy fidirana an-tsokosokon' ny karazam-bararata eoraziana tany Amerika Avaratra, indrindra teny amoron-dalana.

Fampiasana ny bararata[hanova | hanova ny fango]

Fitsaboana nentim-paharazana malagasy[hanova | hanova ny fango]

Eto Madagasikara, ny bararata maniry anaty rano sy hozongozonin' ny rano ka mangovitra dia ampiasain' ny olona amin'ny faritra Betsileo hievohana mba hitsaboana ny tazomoka (malaria) izay mampangovitra ny marary. Voalaza fa matetika ny Vazimba no nipetraka eo akaikin' ny toerana anirian' ny bararata. Ny rano nitanehana foto-bararata dia itsaboaboana amin' ny albominoria ary manadio ny voa. Phragmites communis na Phragmites australis no anaran' ny bararata ara-tsiansa. Atao hoe volotara na katsaroka ko ny anarany amin' ny fiteny malagasy.

Fitaovana sy sakafo[hanova | hanova ny fango]

Ny bararata dia ampiasaina indrindra amin' ny fanaovana fefy mamaritra ny tokotanin' ny trano fonenana, indrindra any amin'ny Sakalava sy ny Sihanaka. Anamboarana trano sy fialofan' ny biby madinika ihany koa ny bararata. Azo anamboarana fandrika na harato koa izy. Azo atao koa ny manamboatra zavamaneno toy ny sodina amin' ny bararata. Ny bararata mbola kely dia indraindray hanin' ny biby na dia tsy tena fanao sakafom-biby aza.