Andriandravindravina
Andriandravindravina, araka ny tetiarana sasany momba ny foko merina ao afovoan-tany eto Madagasikara, no mpanjaka voalohany tao amin'io faritra io. Tsy Merina izy fa Vazimba, isan'ireo mponin'i Madagasikara voalohany. Ny boky Tantara ny Andriana eto Madagasikara[1], izay ahitana ny tetiaran'ny andriana merina, dia milaza fa Andriandravindravina (teny ampahatsiahivana an-kolaka ny ala atsinanana izay novakivakiny mba hahazoany ny ao afovoan-tany) dia nanjaka teo Ambohitsitakatra ao avaratr'Imerina nandevenana azy. Ireto avy ny zanany telo lahy:
- Andrianoranorana, lahimatoa, dia niorim-ponenana teo amoron'ny ranomasin'i Maroantsetra;
- Andriamanjavona nanorim-ponenana teo Angavo, nanambadiany ny andriamanibavy atao hoe Andriambavirano izay voalaza fa nidina avy tany an-danitra ka nankao amin'ny farihy ao an-tampo'Angavo sady niova endrika ho ravina manitra[2];
- Andriananjavona izay nanorim-ponenana tao Anandribe ao andrefan'Angavo.
Amin'ny maha mpanjaka voalohan'ny any afovoan-tany eto Madagasikara an'Andriandravindravina dia heverina ho razamben-Rangita sy Rafohy izay nitaranaka ny mpanjaka Andriamanelo, ilay heverina fa mpanorina ny fanjakana merina. Araka izany dia mety hifanohitra na hifameno amin'ny tetiarana maneho ny fiavian'ny andriana merina hatramin'ny mpanjaka Andrianerinerina ny fedràm-piaviana malagasy.