Tesalôniana voalohany toko voalohany

Ny Tesalôniana voalohany toko voalohany na Tesalônisianina voalohany toko voalohany dia toko ao amin' ny Epistily voalohany ho an' ny Tesalôniana na Taratasy voalohany ho an' ny Tesalônisianina, izay epistily na taratasy nosoratan' i Paoly ho an' ny Kristiana any Tesalônika.

Lahatsoratra

Ao amin' ny Baiboly katôlika amin' ny teny malagasy

¹Paoly sy Silvano ary Timote mamangy ny Eglizy any Tesalonìka, izay ao amin' Andriamanitra Ray sy Jesoa-Kristy Tompo: ²ho aminareo anie ny fahasoavana amam-piadanana.

Misaotra an' Andriamanitra mandrakariva noho ny aminareo rehetra izahay, sady manonona anareo amin' ny fivavahanay, ³ary tsy tapaka ny mahatsiaro eo imason' Andriamanitra Raintsika ny asan' ny finoanareo, sy ny fahafoizan-tenan' ny fitiavanareo, ary ny faharetan' ny fanantenanareo an' i Jesoa-Kristy Tompontsika; ⁴fa fantatray, ry rahalahy malalan' Andriamanitra, fa olom-boafidy hianareo, ⁵satria ny fitorianay ny Evanjely tany aminareo dia tsy tamin' ny teny ihany, fa tamin' ny hery koa, sy tamin' ny Fanahy Masina, ary tamin' ny fampiekena tanteraka; sady fantatrareo koa izay toetranay tany aminareo ho an' ny famonjena anareo. ⁶Noho hianareo nandray ny teny tamin' ny fahoriana be sy tamin' ny hafaliana avy amin' ny Fanahy Masina, dia tonga nanahaka anay sy ny Tompo hianareo, ⁷ka tonga fakan-tahaka ho an' ny mpino rehetra any Masedonia sy Akaia kosa indray. ⁸Ary tsy tany Masedonia sy Akaia ihany no tongan' ny akon' ny tenin' Andriamanitra avy tany aminareo, fa niely hatraiza hatraiza ny lazan' ny finoanareo an' Andriamanitra, ka tsy mila ny hilazany intsony ny olona. ⁹Fa izy rehetra ihany no miresaka ny aminay, ka mitantara ny nahazoanay fidirana ho atý aminareo, sy ny nialanareo tamin' ny sampy mba hanompo an' Andriamanitra velona sy marina, ¹⁰sy hiandry ny Zanany avy any an-danitra, izay natsangany tamin' ny maty, dia Jesoa izay manafaka antsika amin' ny fahatezerana ho avy.

Jereo koa

Toko ao amin' ny Epistily voalohany ho an' ny Tesalôniana:

• Tesalôniana voalohany toko voalohany

• Tesalôniana voalohany toko faharoa
• Tesalôniana voalohany toko fahatelo
• Tesalôniana voalohany toko fahefatra
• Tesalôniana voalohany toko fahadimy

Epistily ho an' ny Tesalôniana:

• Epistily voalohany ho an' ny Tesalôniana
• Epistily faharoa ho an' ny Tesalôniana