Tesalôniana faharoa toko faharoa

Ny Tesalôniana faharoa toko faharoa na Tesalônisianina faharoa toko faharoa dia toko ao amin' ny Epistily faharoa ho an' ny Tesalôniana na Taratasy faharoa ho an' ny Tesalônisiana, izay epistily na taratasy nosoratan' i Paoly ho an' ny Kristiana any Tesalônika.

Lahatsoratra

Ao amin' ny Baiboly katôlika amin' ny teny malagasy

¹Ny amin' ny hahatongavan' i Jesoa-Kristy Tompontsika sy ny hanangonana antsika ho eo aminy, dia mihanta aminareo izahay, ry rahalahy, ²mba tsy hety hozongozonin-tsaina mora foana hianareo, na ho azo ampitahotahorina foana, na amin' ny fanahy izany, na amin' ny teny, na amin' ny taratasy hamboina ho avy aminay, mova tsy ny efa antomotra iny ny andron' ny Tompo. ³Aza mety hofitahin' olona velively, fa tsy maintsy hitranga aloha ny fivadiham-be, sy hiseho ny olom-pahotana, dia ilay zanaky ny fahaverezana, ⁴izay mitsangan-ko fahavalo sy manandra-tena ho ambonin' izay rehetra atao hoe Andriamanitra na ivavahana, ary sahy mipetraka ao amin' ny tempolin' Andriamanitra sy maneho ny tenany ho Andriamanitra aza.

⁵Tsy tsaroanareo va fa zavatra efa voalazako taminareo izany, fony aho mbola tany aminareo? ⁶Ary ankehitriny, fantatrareo ny zava-misakana azy tsy hiseho amin' ny fotoan' androny. ⁷Fa efa miasa sahady ny hevi-miafim-paharatsiana izao, saingy ilay misakana no mbola ao mandra-pihàtany, ⁸ka dia hiseho amin' izany ilay ratsy, ka holevonin' i Jesoa amin' ny fofon' ain' ny vavany, sy hofoanany amin' ny fisehoan' ny fahatongavany. ⁹Ary ny fisehoan' ilay ratsy, noho ny asan' i Satana dia homban'ny hery sy famantarana amam-pahagagana sandoka rehetra, ¹⁰sady harahiny ny fanangolen-dratsy rehetra an' izay ho very, noho ireo tsy nandray ny fitiavana ny fahamarinana tokony ho nahitany famonjena. ¹¹Hany ka anirahan' Andriamanitra fitaka mahadiso hevitra izy ireo hinoany ny lainga, ¹²mba hohelohina avokoa izay rehetra tsy nino ny marina, fa nankasitraka ny tsy marina.

¹³Ary izahay, ry rahalahy malalan' ny Tompo, dia tsy maintsy misaotra an' Andriamanitra mandrakariva ny aminareo, noho hianareo nofidin' Andriamanitra hatramin' ny voalohany hahazo famonjena amin' ny fanamasinan' ny Fanahy, sy amin' ny finoana ny marina; ¹⁴ary ny Evanjelinay no niantsoany anareo ho amin' izany, mba hahazoanareo ny voninahitr' i Jesoa-Kristy Tompontsika. ¹⁵Koa tomoera tsara, ry rahalahy; ary tano ny fampianarana noraisinareo, na ny tamin' ny teny am-bava, na ny tamin' ny taratasinay. ¹⁶Enga anie Jesoa-Kristy Tompontsika, sy Andriamanitra Raintsika, izay efa tia antsika, ka nanome antsika fanalana alahelo mandrakizay, sy fanantenana tsara amin' ny fahasoavana, ¹⁷no hanafaka alahelo ny fonareo sy hankahery anareo amin' ny asa tsara aman-teny soa rehetra!

(2Tesalônisianina 2:1-17, Ny Baiboly Masina)

Lahatsoratra

Ao amin' ny Baiboly katôlika amin' ny teny malagasy

Jereo koa