Sobahia
Ny sobahia na sobahya dia lamba nentim-paharazana malagasy, vita amin' ny akoran-javamaniry notenomina. Taloha dia ny andriana, indrindra tao amin' ny Sakalava, nitafy sobahia. Ny sobahia dia lamba saro-bidy sy avo lenta eo amin' ny kolontsaina malagasy. Matetika izy dia miloko mena na volomboasary na volomboasary manopy volamena na voloparasy. Any amin' ny Tontolo Tatsinanana no fiavian' ity lamba ity izay nampidirin' ny Arabo mpivarotra any amin' ny morontsiraka andrefan' i Madagasikara tamin' ny taonjato faha-14.
Ho an' ny mpandala ny nentim-paharazana, ny sobahia dia lamba natokana hitafian' ny olona avy amin' ny fianakavian' ny mpanjaka. Ny sobahia itafian' ny Zafinimena dia mena fa ny an' ny Zafinifotsy dia fotsy misy sisiny somary miloko mena. Ny mena sy fotsy dia mampahatsiahy ny tantara momba an' Andriandahifotsy izay nametraka volamena sy volafotsy teo ambony vilia. Nampisafidianiny ny zanany lahy roa. Ny zokiny nisafidy ny volamena, fa ny zandriny nisafidy ny volafotsy.
Ho an' ny Sakalavan' i Boeny dia mariky ny maha andriana ny sobahia ka tsy misy nitafy azy raha tsy ny mpanjaka mandritra ny lanonana nentim-paharazanan toy ny fitampoha, ny tsangan-tsaiñy, ny fandroana an-driaka, sns.
Nanjary nalaza ny fitafiana sobahia rehefa nandeha ny fotoana. Lasa fitafiana anehoana ny maha Malagasy ny sobahia ankehitriny. Ankehitriny dia fenti-mamonjy fanasana sy lanonana ny sobahia, toy ny fampakaram-bady sy ny hafa any amin' ny morontsiraka andrefana ao amin' ny Faritra Boeny. Nampitondrana ny anarana hoe "Sobahya" ny fetibe ara-kolontsaina izay atao isan-taona any amin' ny kaominin' i Katsepy izay toerana nananganana ny Fanjakana Antalaotsy any Boina. Tamin' ny fametrahana azy tao Ambanja dia nitafy sobahia ny ny arseveka Donatien Francis Randriamalala (de).