Semiaza

I Samiaza dia karazana anjely lavo resahina ao amin' ny literatiora apôkrifa jiosy sy kristiana, izay anisan' ny atao hoe Mpiambina (grika: ἐγρήγοροι / egrêgoroi). Amin' ny teny arameana izy dia atao hoe שמיחזה, fa amin' ny teny grika dia Σεμιαζά / Semiadza, izay midika hoe "fikomiana ratsy laza". Fantatra koa amin' ny anarana hoe Semihaza, Semehaza, Semiazaza, Samiaza, Semhazay, Semaziôsy, Oza ary Ameziaràka na Amezaràka koa izy.

Ao amin’ ny Bokin’ i Henôka, izay fara fahakeliny, nosoratana tamin’ ny taonjato faha-3 tal. J. K., i Samiaza dia voalaza fa anjely teo mpitarika ny Mpiambina sy mpanentana ny fidinan' izy ireo ety an-tany. Rehefa tonga teo amin’ ny olombelona ireo Mpiambina ireo dia nampianatra azy ireo siansa voarara (asa metaly, fanandroan-kintana, siansan' ny fitsaboana, ody famitahana) ary nanao firaisana ara-nofo tamin’ ny vehivavy. Niteraka Nefilima ireo vehivavy ireo avy eo. I Samiaza sy ny anjely nanaraka azy dia noroahin’ Andriamanitra izy ireo taorian' izany. Nanapa-kevitra Andriamajitra fa hanafoana ny Nefilima tsy ho ety ambonin' ny tany tamin’ ny alalan’ ny Safodrano. Araka ny voalazan’ ny angano sasany dia nahafantatra ny anaran’ Andriamanitra i Samiaza ary nanao fifanarahana tamin’ ny vehivavy iray mba hanambara izany taminy.

Ireto ny anaran' ny anjely sasany, amin' ny anjely potraka mliisa 199 teo ambany fibaikoan' i Samiaza, araka ny Bokin' i Henôka: Orakabarameela, Akibeela, Tamiela, Ramoela, Danela, Azkeela, Sarakoiala, Azaela, Armersa, Batraala, Anane, Zavebe, Samsaveela, Ertaela, Torela, Jômiaela ary Araziala.