Nekao II

Avy amin'i Wikipedia
Ny farao Nekao II

I Nekao II na Nekô II dia mpanjaka tao amin' ny tarana-mpanjaka faha-26 (610–595 tal. i J.K.), izay nanjaka tao Sais, tany Ejipta. Nanao asa fanorenana maromaro nanerana ny fanjakany i Nekao. Tamin' ny fotoana nanjakany, araka ny voalazan' i Herôdôtôsy, mpahay tantara grika, dia nandefa iraka Fenisianina i Nekao II, izay nandeha sambo avy any amin' ny Ranomasina Mena nanodidina an' i Afrika, tao anatin' ny telo taona, ka nankany amin' ny Andilan-dranomasin' i Gibraltar ary niverina tany Ejipta. Ny zanany lahy, Psamtika II, dia nety ho nanaisotra ny anaran' i Nekao tamin' ny tsangambato sy ny zavatra naorina rehetra, rehefa niandimby azy.

Amin' ny teny grika izy dia atao hoe Νεκώς Β' / Nekôs II fa amin' ny teny hebreo dia נְכוֹ‎ / Neḵō.

Nanana anjara toerana lehibe teo amin' ny tantaran' ny Empita Asirianina Vaovao sy ny Empira Babilôniana Vaovao ary ny Fanjakan' i Jodà i Nekao. I Nekao II dia azo inoana fa ilay farao Nekao izay voatonona ao amin' ny Boky faharoan' ny Mpanjaka sy ny Boky faharoan' ny Tantara ary Bokin' i Jeremia ao amin' ny Baiboly. Ny fandresena tany Azia no zava-kendren' ny diabe fanafihana nataon' i Nekao faharoa, mba hanakanana ny fandrosoan' ny Empira Babilônianina Vaovao miankandrefana, ary hanapaka ny lalan' ny varotra namakivaky an' i Eofrata. Resy anefa ny Egipsiana noho ny fanafihana tsy nampoizina nataon' ny Babilôniana, ka noroahina avy tany Siria tamin' ny farany izy ireo.

Jereo koa[hanova | hanova ny fango]